ORANJESTAD (AAN): Despues di a trece dos tema kompa cu ta den circulacion pa e ultimo 2 añanan di cual un di nan a pega fuerte cu ta ‘To Love Somebody’ (un cover di e agrupacion The Beegees),
e artista cantante residencia na Hulanda Nando Chirino ta trece un tema completamente nobo riba mercado den colaboracion cu e cantante compositor Stanley Clementina conoci como e ‘Kompa Guru’.
“Honey People” ta e titulo di e Power Kompa aki, e tin un ritmo hopi alegre, sabroso cu a cai na su lugar pa seramento di e aña aki y pa pa habri 2024 cu celebracion di nos Carnaval 70. E cancion aki ta haya su promocion no solamente aki na Aruba, pero na Antiyas en general y tambe na e Islanan Caribe manera Martinique y Guadalupe, unda e ritmo aki ta masha gusta.
Nando Chirino no ta un artista desconoci pa nos aki na Aruba, den añanan 90 Nando a sa di participa den festivalnan di Calypso y Roadmarch unda el a trece un tremendo roadmarch cu te awe nos por scuche resona den temporada di Carnaval cu ta e roadmarch ‘Wapa Eh’, Scarecrow’.
Desde aña 2002 Nando ta residencia na Hulanda unda e ta forma parti di e banda ‘La Fiesta Allroundband’ unda e ta e cantante principal, y tambe Nando ta haci presentacion como solista y cu su banda Nando & Friends.
Nando y Stanley, ta coleganan musical pa 25 aña caba y e aña aki porfin nan a uni forsa pa trece un cancion nobo cu un ritmo sabroso pa por goza di dje. Stanley Clementina cu tambe ta residencia na Hulanda a saca varios cancionan cu ta bon resona na Curaçao, Bonaire y tambe aki na Aruba, un di e cancionan hopi gusta ta ‘Masha Ten’ cu el a presenta cu su banda C-Shaw un cover na Papiamento di e cancion ‘Bon Bon’ di e banda haitiano Enposib. Stanley ta conoci pa ta e Kompa Guru di Antias y Hulanda ya cu Stanley a sa di inspira varios bandanan y artistanan na Aruba, Curaçao, Bonaire y Hulanda pa laga e ritmo di kompa resona, trece e dushi ritmo aki back pa nos.
Nando y Stanley sigur lo sigui uni forsa den 2024 y trece proyectonan musical pa nos pueblo, por disfruta di ‘Power Kompa ‘HONEY PEOPLE’ por medio di e plataforma Youtube, y diferente otro plataforma digital .
