ORANJESTAD (AAN): Aruba Airport Authority N.V. (AAA) tin e placer di anuncia un desaroyo nobo den conexion for di La Isabela International Airport (JBQ) y awo tambe for di Punta Cana (PUJ).
E expansion aki ta demostra nan dedicacion den reenforsa e laso cu Aruba.
Expansion di servicio semanal
Debi na e demanda creciente y na e popularidad pa biaha pa nos isla, Air Century, cu
anteriormente tabata opera e ruta Aeropuerto Internacional La Isabela (JBQ) – Aruba (AUA) dos
biaha pa siman, awo a amplia su oferta di vuelo. E movecion strategico aki tin como meta pa
atrae un mayor participacion di parti di e mercado, satisface e demanda creciente actual y mehora
e conexion en general.
Desde dia 15 di december, Air Century a aumenta su servicionan entre JBQ y AUA di dos pa tres
vuelo semanal, brindando e pasaheronan mas flexibilidad di biahe riba dialuna, diaranson y
diabierna.
Un gateway nobo riba e mapa di ruta di AUA
E ruta Punta Cana - Aruba tabata existi anteriormente, pero a suspend’e na aña 2011, loke a
resulta den un ruta lubida pa varios aña. Na momento cu a ripara cu keto bay e demanda pa e ruta
aki tabata existi, Air Century a probecha e oportunidad pa reestablece e ruta bek.
Desde dia 22 di december 2023, Air Century a reintroduci e gateway di Punta Cana riba e mapa
di ruta di AUA. Basa riba nos compromiso di diferente opcion di biahe, e ruta aki lo ta un vuelo
di henter aña cu lo ofrece vuelo semanal riba dialuna, diaranson y diabierna.
“Nos ta hopi contento pa inaugura e ruta desde y pa Aeropuerto Internacional di Punta Cana
(PUJ), e principal porta di entrada pa turista pa Republica Dominicana, brindando mas opcion di conexion.
E conexion ta crucial pa turismo su desaroyo. Cu e ruta aki nos ta pretende promove e
concepto di multidestinacion, brindando nos pasaheronan e oportunidad pa scoge itinerario cu lo
permiti nan pa biba experiencianan inolvidabel na diferente ciudad”, asina Omar Chahin,
presidente di Air Century, a duna di conoce.
“Mas expansion di nos conexion dentro di e region Caribe ta un di nos puntonan principal di
concentracion durante exploracion di ruta nobo y oportunidad pa Aeropuerto di Aruba. E
incorporacion di e servicio aki pa Punta Cana ta pas perfectamente. Nos ta yama e ruta aki
bonbini cu brasa habri y nos ta spera di por sigui explora mas oportunidad di awo pa futuro”,
asina Jo-Anne Meaux-Arends, Aviation Business Development Executive na AAA, a expresa.
Vuelo y capacidad di stoel
E ruta di JBQ y PUJ lo ta opera pa un CRJ2 cu ta conta cu un capacidad di 50 stoel pa cada
vuelo. E aumento di vuelo semanal pa JBQ y e ruta nobo di Punta Cana lo genera 750 stoel
adicional pa luna, loke ta representa un 60% di e capacidad pa e operacionnan di Air Century
desde Santo Domingo.
Ademas, e vuelo di Punta Cana tin un duracion di 1 ora y 15 minuut desde Aruba y e ta e di dos
destinacion mas popular den e region di Latino America.
