Nadien Phillip compitiendo na Hulanda den prome edicion di Miss Universe Dutch Caribbean 2025

ORANJESTAD (AAN):  Nadien Phillip ta un Arubiano y conhuntamente cu 7 otro dama di entre otro Corsou y Sint Maarten ta forma e 8 finalistanan compitendo pa e corona di Miss Universe Dutch Caribbean tumando luga na Hulanda dia 6 di April.

Esaki ta e prome edicion di e certamen aki, y e ganadora lo tin e responsabilidad di representa e muhernan fuerte, sabi y balente cu herencia Caribe Hulandes riba e escenario nacional di “Miss Universe Netherlands”.   

Mucho mas cu un concurso di beyesa

            Pa Nadien e ta su prome biaha participando den un concurso di beyesa y e ta describi e experiencia aki como uno mucho mas cu un concurso di beyesa. Desde December cu el a wordo selecciona den e casting na Hulanda como un finalista, e trayecto tabata uno yena cu transformacion, empoderamento y crecemento personal. Nadien ta splica cu locual cu hende ta mira riba e anochi final, ta e resultado di tur e trabou duro di lunanan di preparacion riba diferente area manera public speaking, catwalk y styling. Banda di esaki, den e trayecto ta pone hopi enfasis riba advocacy, charity, con bo ta profila bo mes riba social media y bo contribucion na sociedad. 

Un poco di e organisacion di Miss Universe Dutch Caribbean

            Tur aña  Hulanda ta organisa Miss Universe Netherlands, for di cual ta elegi un ganadora cu ta representa e pais na nivel internacional. Na Hulanda e participantenan cu ta competi pa Miss Universe Netherlands ta damanan cu ya a competi y gana e eleccion provincial.
            Por ehempel, e ganadora di provincie Utrecht, ganadora di provincie Noord-Holland, ganadora di provincie Groningen etc. tur lo topa otro pa competi pa e titulo di Miss Universe Netherlands. E aña aki a introduci un trayecto extra pa damanan cu herencia Caribe Hulandes cu actualmente ta na Hulanda, pa por representa nan origen orguyosamente a traves di e trayecto aki Dutch Caribbean. E ganadora lo competi hunto cu ganadoranan di tur provincie pa e titulo maximo di Miss Universe Netherlands.

            Desde 2023 cu Nadien a finalisa cu su estudio na Universidad di Aruba den e facultad di Organization, Governance and Management (OGM), el a muda pa Hulanda pa sigui desaroya su mes. Esey ta haci cu e por a inscribi su mes pa e concurso aki na Hulanda. 

Pakico participa den Miss Universe Dutch Caribbean

            Nadien ta conta cu e semper a gusta e mundo di beyesa, y na un edad hoben el a participa den competencia di modelahe:  Aruba Model Search 2008. Den e concurso aki el bira modelo di aña pa Kok Optica y a modela den diferente show pa boutique nan rond Aruba. El a haci esaki formando parti di e agencia di modelahe di Ronchi de Cuba.

            Nadien semper a admira certamen nan di Miss Universo y tabata algo cu e kier a “try-out”, sinembargo esaki pa hopi aña no tabata posibel door cu entre otro el a bira mama na un edad hoben. Na aña 2023 y 2024 e certamen internacional a introduci diferente cambio, entre otro  cu damanan cu tin yiu of cu ta casa por participa, y tampoco tin limite di edad mas. Pesey Nadien di 34 aña a mira esaki como un oportunidad pa sigui tras di su soño y a dicidi pa inscribi su mes. 

Nadien su mensahe

            Nadien ta kere firmemente den e frase na ingles: “You can’t pour from an empty cup” Bo no por duna na otro locual cu bo no tin den bo mes. Pesey e ta haci uzo di e hashtag #FillYourCup pa stimula tur hende priorisa nan desaroyo personal, amor propio y pa persigui bo soñonan  no matter ki edad (lifelong learning). “Ora bo ta orguyoso di bo mes y satisfecho cu bo logronan, tur hende rond dibo ta beneficia di e mihor version di bo”.