Nacionnan Uni lo asisti Aruba y region Caribense den avansa desaroyo sostenibel

Minister Geoffrey Wever:

ORANJESTAD (AAN): Aruba a ricibi un delegacion di diferente organisacion di Nacionnan Uni (United Nations) cu ta acompañando e Resident Coordinator a.i. di United Nations pa Aruba, Corsou, St. Maarten, Trinidad & Tobago y Suriname, sr. Dennis Zulu den su bishita na Aruba.

            E meta di e bishita di United Nations (UN) ta pa fortifica e partnership entre e ‘Dutch Islands UN Country Team y Gobierno di Aruba y pa inventarisa e prioridadnan di desaroyo di Aruba pa alinea esaki cu e cooperacion regional den e Multi-Country Sustainable Development Cooperation Framework pa avansa e Agenda 2030 pa desaroyo sostenibel.

            Como Minister di Desaroyo Sostenibel, mr. Geoffrey Wever, a hiba palabra den e meeting di mainta entre United Nations y representantenan di sector publico.

            Minister Geoffrey Wever ta indica cu desde cu Aruba a compromete na 2015 pa avansa Agenda 2030 pa desaroyo sostenibel, diferente iniciativa nacional a bin pa produci maneho y ehecuta proyecto y actividadnan di parti di gobierno, sector priva, mundo academico y organisacionnan di sociedad civil.

            Aruba a bin ta haci progreso den implementacion di Sustainable Development Goals (SDGs), pero tin retonan pa enfrenta den esaki, cual ta entre otro e necesidad di datonan di calidad pa tuma decision y monitorea esaki y e recursonan financiero y personal limita.

            Pa atende cu e reto di datonan di calidad pa formula y monitorea maneho y desaroyo sostenibel, manera ta conoci, Minister Wever ta implementando e Sistema Nacional di Estadistica (Nationaal Statistisch Systeem - NSS) cual ta un instrumento esencial den bon gobernacion. Datonan confiabel y obhetivo mester ta e base di maneho di un gobierno.

            Representante di United Nations Economic Commission for Latin America and the Caribbean, dr. Abdullahi Abdulkadri, a elogia Aruba cu e implementacion di e NSS, cual ta un instrumento esencial pa guia un pais y pa tin un publico bon informa abase di datos confiabel.

             “Gobierno mester traha hunto di manera coordina cu partnernan strategico nacional y internacional pa atende nos retonan den avansa desaroyo sostenibel na Aruba", minister Geoffrey Wever ta conclui.