ORANJESTAD (AAN): Director ing. Edwin Jacobs di AZV a indica cu na numeroso ocasion a reuni cu tur esnan na Aruba cu ta Dunador di Cuido,
pa duna nan informacion riba e plan pa introduci Contribucion Propio (“eigenbijdrage”). A desmenti cu entrante 1 April lo cuminza cobra esaki.
Jacobs a duna di conoce cu 9 di maart a tene un sesion den Cas di Cultura unda durante pa cai 3 ora tabata habri pa cu e tema di cuido. A ricibi hopi critica y a tende riba e preocupacion cu tin.
El a remarca cu ainda no tin fecha fiho pa loke ta e contribucion propio. Tanten e no pasa Parlamento no tin un fecha fiho pa introduci'e y tanten cu tecnicamente no por implement'e, no tin un fecha di introduccion.
Aunke e decreto gubernamental drenta na vigor 1 di Mei, 1 di Juni of 1 di Juli, no necesariamente ta cuminsa cobr'e, pasobra tin cu percura pa e infrastructura ta cla y pa e comunicacion, e director di AZV a bisa.
Desde October 2021 ta trahando riba un team di comunicacion y aworaki a mira un cara nobo cu a haci introduccion. Ta fortificando e team di AZV y esun di SVb pa asina traha riba comunicacion y pa percura pa e informacionnan yega na tempo, a splica.
Pesey, a bisa, e ta sorprendi ora cu el a tuma nota di personanan den cuido cu tabata den e sesion y ta sali bisa cu e introduccion di e contribucion propio ta riba 1 di April. Pero esey no por sosode pasobra ainda no ta cla.
Tur interes mester wordo evalua pa Parlamento, Jacobs a remarca. No ta na AZV pa haci esey. Ta na parlamento y na Gobierno.
Pero ta importante pa no crea panico innecesario den comunidad. Na momento cu e 'eigenbijdrage' wordo introduci (ora cu e ley pasa), AZV ta e prome pa informa comunidad. Y dia cu e ta cla pa wordo implementa, simannan prome AZV lo informa y lo percura di uza tur medio posibel pa informa comunidad con e tan bay wordo implementa, a enfatisa.
