Na memoria di Señora vda. Anna Maduro-Roga miho conoci como ‘Chicho di Yati’

Tocado di Caha di Orgel “‘Gloria’ di Sra. Chanita”

ORANJESTAD (AAN): Señora Anna Maduro-Roga ( miho conoci como "Chichi di Yati") a nace riba dia 8 di november 1932 y ta fayece riba dia 21 di december 2024.

   Na un edad hopi hoben e la siña toca caha di orgel ‘El Unico’  di su Tata Aniceto Roga d.f.m. Despues el’a casa cu Señor Serapio Maduro, yiu di criansa di Srta. Chanita Vrolijk doño di caha di orgel ‘Gloria’. Ora cu srta. Chanita no por a bay toca, su caha di orgel, esta ‘Gloria’ Sra. Anna tawata bay toca esey pa Chanita, kende awe ta d.f.m. Na momento cu Chanita d.f.m. a fayece, e yiu di criansa Serapio (Yati) Maduro d.f.m. a bira doño di caha di orgel ‘Gloria’.

For di aña 1985 Señora Anna a sali toca e caha di orgel ‘Gloria’ cu su casa Yati, tur caminda aki na Aruba, na casnan di famia, hotelnan, y Airport Reina Beatrix. Na comienso di luna di  december na 1986 nan a toca den caya grandi di Nassaustraat na 0ranjestad (playa). 

Nan tawata cuminsa toca dilanti di establecimento di Penha Aruba y nan ta bay finalisa te dilanti di Refresqueria Zepp Wever, awendia Djiespie’s Place.

Na aña 1990 for di luna di januari te cu luna di december 1990, nan a toca riba tur diahuebs den Sonesta Mall, awendia e ta Renaissance Mall Aruba. Y tur ora cu yama nan diripiente pa bay toca na cualkier caminda, nan ta sali bay toca.

Semper Sra. Anna ta gusta toca su caha di orgel ‘Gloria’. E ultimo biaha cu el’a sali bay toca den publico tawata 4 aña pasa na Young Fellow cu e Caha di Orgel ‘Gloria’. E tempo ey cu su 88 aña di edad el’a sali bay toca y tabata sa di pone e publico bailabel, baila na smaak.

Dos aña pasa riba dia di su fecha natalicio, cu e la cumpli 90 aña, el’a sabi di pone ambiente y esnan cu a bini celebra su cumpleaños bailabel a gosa. Akinan tur a baila na smaak ya sa.

Awe sigur un pilar di caha di orgel y cu a stima e tradicion aki, a bay laga nos. Kende a toca caha di orgel semper di su bida.

Awor den cielo lo e sigui deleita cu su piesanan di caha di orgel.

Sra. Anna Maduro-Roga lo keda semper den nos mente y curason.