Na ImSan ta celebrando Siman di Ambulance poniendo “un tiki luz” riba su trahadornan

*Hopi melding ta bin for di adulto mayor” cu malesa cronico

ORANJESTAD (AAN) – Servicio di Ambulance na ImSan ta celebrando e siman aki, e Siman di Ambulans. Mundialmente, ta wordo reconoci y mustra aprecio pa e trahadornan di Ambulans, y na Aruba no ta otro. Den entrevista cu señor Liderato Hoek, Hefe di Servicio di Ambulans, el a expresa cu nan a pone un “un tiki luz riba e trahadornan” pa honra e trabao profesional, cu nan ta haci.   

            “A base di esey nos tin un programa cu diferente actividad pa e trahadornan cu nos a cuminza desde Dialuna, cu un Santo Sacrificio di Misa, na Misa di Santa Cruz. Nos awe un mini symposium di practicamente mitad dia, pa e trahadornan pa duna nan informacion tocante hopi aspecto cu ta esencial den cuido di trabao den ambulance”, Liderato Hoek a agrega.

            Servicio di Ambulance tin mas personal aworaki, y e trabao si bo wak e riba su mes, cada dia ta bira hopi mas. “Nos no mester lubida cu Aruba ta bira mas druk, e trafico a bira mas druk, pero un aspecto masha importante ta e vergrijzen cu ta sosodiendo na Aruba, cu mas hende cu malesanan cronico cu si ta refleha bek den e servicio cu nos ta duna. Pues, nos ta haya hopi melding pa personanan cu tin malesanan cronico, y esey nos sa cu no ta bay cambia pero cu e añanan e ta bay bira mas hopi”, Liderato Hoek a señala.

            Hoek a agrega cu locual nan tin na nan wagen-park y cantidad di personal nan por draai cu locual nan tin, pero e ta sinti cu nan tin un tiki mas pasobra nunca por sa ki momento un calamidad ta bin, y t’asina cu nan capacidad lo no ta suficiente.

            “Esey ta algo cu nos ta traha riba dje, hunto cu AZV, pa nos tin mas ekipo, mas personal. Aña pasa nos a haya cuater auto nobo, nos ta aworaki pendiente pa nos haya dos auto mas, nos a manda pidi material di opleiding y training constantemente, y esey ta cosnan cu bo mester keda haci pa bo keda upgrade, vooral di personal y sistema di duna servicio”, Liberato Hoek, Hefe di Servicio di Ambulance-InSam, a duna di conoce.