Na e momentonan mas dificil tur hende a wordo yuda na Aruba, incluyendo esnan indocumenta

Minister Glenbert Croes:

ORANJESTAD (AAN):   Minister di Integracion, Glenbert Croes, a duna di conoce cu a keda demostra cu durante COVID, hopi hende cu a keda na Aruba, a keda ilegal. A percura pa tur hende na Aruba sobrevivi, a bisa.

            Ora cu a mira e reportahe cu a sali na Hulanda, Minister Croes a indica, el a preocupa pasobra e no kier pa e raport aki refleha comosifuera cu Aruba no a asumi su responsabilidad pa cu tur hende cu ta na Aruba. Sea cu e persona ta lega of ilegal, Aruba a asumi su responsabilidad pa cu tur hende.

            Aworaki, despues di Covid, gobierno ta haciendo un estudio pa purba haya un cifra real di e cantidad di personanan indocumenta. Esaki ta importante pasobra den cuadro di e maneho di integracion, a bisa cu tin un desaroyo economico cu ta exigi trahado riba e mercado laboral.

            Segun Croes, kier bin cu un trayecto di integracion, pero pa esnan cu a drenta legal Aruba. E ta subraya cu den loke ta e politica laboral, e yiunan di tera semper na bin na prome lugar pa un trabao. Si no tin hende, e ora ta check cerca e stranhero cu ta legal na Aruba (yega Aruba via aeropuerto y pasa Migracion).

            Den e caso aki ta duna preferencia na esnan cu ya caba ta na Aruba. Kier pa e personanan aki pasa e 'screening' di DPL, di DIMAS y si no tin un yiu di tera pa e funcion ey, e stranhero ta bin na remarca pa haya permiso, pa cuminsa paga belasting, AZV, SVb, etc y aporta na e desaroyo di e pais.

            Den e raportahe esey no a resalta. Na su parecer loke ta mas importante ta cu Aruba a asumi su responsabilidad cu tur hende y esey mester wordo admira, a remarca.

            Segun e mandatario, na e momentonan mas dificil, tur hende a wordo yuda. Ora cu ta papia den e reportahe cu tin 17  mil persona indocumenta na Aruba mester bisa tambe cu na Aruba tambe ta brindando ayudo y cu no ta birando lomba pa cu nan situacion.

            Mester realisa cu Aruba ta isla chikito cu a haci hopi, pero cu ta keda chikito, Minister Glenbert Croes a expresa.