Minister Oduber: --- ORANJESTAD (AAN): Dialuna mainta Gobierno hunto cu Crisis Team a tene un conferencia di prensa pa duna un update riba e situacion di COVID-19 y
despues cu Prome Minister Evelyn Wever Croes a indica cu e variante Omicron a worde constata na Aruba tambe, minister di Salubridad Dangui Oduber a trece dilanti cu tabata inevitable cu Omicron lo worde detecta na Aruba.
“Nos tin cu bisa cu nos tin e situacion bao di control”.
For di momento cu e crisis a cuminza y door cu nos tin mas experiencia manehando e crisis, nos a pone como strategia cu si nos por mantene e average di caso nobo na menos di 30 pa dia, e ta algo cu nos por maneha na tur momento, segun Oduber.
El a splica cu e ta spera cu por mantene e average diario bao di 30 manera cu e ta aworaki ainda.
“Nos a mira si cu den e ultimo dianan aki nos ta experienciando un aumento leve den e cantidad di caso nobo pa dia y tambe e grado di test positivo(positivity rate)”.
Nos ta monitor esaki diariamente pa wak si nos mester ahusta nos medidanan, segun e mandatario.
El a splica cu na e momentonan aki e situacion na hospital ta controlable, sigur pa e ultimo dos lunanan aki caba.
Segun Oduber, actualmente tin 3 persona den ICU na Aruba, tin 6 pashent den ICU na Colombia y tin 4 pashent den departamento di COVID.
Segun e mandatario e situacion te na e momentonan aki ta bao di control.
“Un problema ta si cu siman pasa hospitalnan na Colombia a informa AZV cu nan no ta bay acepta ningun pashent mas cu ta worde manda di Aruba pa tratamento na Colombia cu no ta vacuna”.
Mi tin cu pone hopi enfasis riba esaki, pasobra esaki ta un decision di pais Colombia y no un decision di Gobierno di Aruba of AZV.
Esaki ta conta pa Merca tambe, pues e ta un situacion fastioso pa esnan cu ainda no a tuma nan vacuna, pasobra si un persona no vacuna bira malo di COVID of cualkier otro malesa, dificilmente nos por manda nan afo, segun Oduber, kende a sigui bisa cu pesey Gobierno ta deliberando cu Hulanda den cuadro di cooperacion di hospitalnan den Reino, pa wak si tin un posibilidad pa manda e pashentnan aki cu no ta vacuna y tin mester di tratamento pa Curaçao, si a caso esey ta necesario.
El a splica cu ta buscando un solucion pa esaki.
“Pesey nos ta urgi tur esnan cu pa cualkier motibo no a vacuna ainda, pa bay haci esaki mas pronto posibel, pa evita cu nan ta haya nan mes den un situacion cu ta bira hopi complica debi na e decision di gobiernonan Colombiano y Mericano”, segun Oduber.
E mandatario a stimula tambe tur hende pa tuma e ‘booster shot’, cu lo yuda evita cu hende lo bira asina malo cu nan tin cu worde interna den hospital.
El a splica cu e siman aki mes Aruba ta bay ricibi 45.000 vacuna extra for di Hulanda.
