Nan mester upload resultado un dia prome cu viaha
ORANJESTAD (AAN) — Den conferencia di prensa di gobierno tabata presente Ronella Croes, director di Oficina di Turismo di Aruba (ATA), ken a elabora tocante e introduccion di medida nobo pa paisnan cu categoria hopi halto, pa loke ta Omicron.
“Sin duda Omicron ta afectando e mundo di turismo y di viahe, y esey no a scapa ningun di nos. Por nota con na paisnan unda e ta hopi presente caba, e casonan positivo ta subi y ta ser indica cu esaki ta mara na grado halto di transmision di e variante aki”, Ronella Croes a menciona.
Paisnan afecta ta tuma medida pa gana tempo pa frena e transmision y suministra e di tres vacuna, esta e booster shot bao mayoria di e populacion, Croes a indica. Paisnan afecta tambe ta ahusta maneho encuanto e entrada di bishitantenan, na nan pais. Aruba tambe a haci esaki.
“Dia 29 di November den un rueda di prensa, a anuncia diferente ahustacion pa cu entrada, entre otro. Resumiendo kico a anuncia e dia aki, for di dia 1 di December a prohibi residentenan y personanan procedente di Sudafrica di Soto, Swaziland, Namibia, Mozambique, Zimbabwe y Botswana pa biaha pa Aruba. Tambe a anuncia e dia ey cu entrante dia 4 di December, Aruba a introduci un categoria nobo di clasifica paisnan, di riesgo hopi halto. Te na e momentonan aki nos tin dos categoria: uno, di paisnan di nivel di riesgo abao y otro di paisnan cu nivel di riesgo halto. Pues e categoria nobo ta di hopi halto”, Ronella Croes a reitera.
Pa e paisnan cu ta califica como di riesgo hopi halto tin mas 72 ora pa haci un test di PCI prome cu biaha pa Aruba y upload esaki debidamente, pero tin un dia pa haci esaki prome cu e viahe. “Pues, esey ta e cambio mas cerca di bo viahe, mas cerca tin cu haci e test e ora ey, y upload su resultado negativo”, Ronella a reitera.
El a agrega cu e situacion di e paisnan ta wordo sigui y evalua cada dos siman, locual Garreth Tromp ta haci y ATA ta haya e resultadonan y keda ahusta e ora ey e lista di paisnan conforme e tras categorianan cu el a menciona.
