Na December awor e grupo ‘Palmita di Oro’ lo bay stop di existi

Grupo di Piedra Plat ta existi pa 17 aña

ORANJESTAD (AAN): Siman pasa dia 10 September 2024, e Grupo di Damas 50+ na Piedra Plat, conoci como “Palmita Di Oro” a celebra nan di 17 aña di existencia.  Tur esaki bao guia di Glenda D. Bareño y Marcia Bareño.

   Nan a cuminsa di 10 September 2007 cu nan prome encuentro. Tur Dialuna nan tabata bin hunto pa haya lectura, haci obra di man, seso sport, weganan estafette, bingo, sali trip, y hasta weganan traha door di Glenda manera di ken e wowonan ta, di ken e pia ta, di ken e derriere ta? Esey ta djis pa menciona un par.

   Despues el a cambia pa un temporada riba Diaranson pa despues bai bek Dialuna. Pa awor e ta cada pasa un siman riba Dialuna mas tanto te ora e grupo cera.

   DIARIO a ser informa, cu despues di 17 aña e grupo Palmita di Oro lo stop su encuentronan entrante December 2024.

   Palmita a conoce varios miembro na un punto riba 40. Tin a sali y tin a bay laga nan. E grupo a haya ayudo durante añanan di famia cu ta yuda ora di fiesta y ora dirigente tabata bay afo pa sigui cu e encuentronan.

   Palmita di Oro ta manda un danki grandi na Georgina Thurston, Brenda Croes, Myrtha Bareño, Ghislaine Croes y Mylene Croes, kendenan a yuda durante e añanan.

   Tambe nan kier a gradici tur miembro cu a tuma parti di Palmita di Oro durante e 17 añanan cu a pasa.  Muy especial e miembronan cu a aporta extra cu dulce de leche, snacks, obranan y regalonan pa otro miembronan durante hopi tempo.  Hopi danki na tur cu a yuda sea individuonan y tambe comerciante durante e 17 añanan aki cu donacion, lectura, etc.

   Nan kier a tuma nota di e 4 miembronan cu ta cu nan ainda desde 10 September 2024, esta Glenda D. Bareño, Marcia Bareño, Lucila Croes y Brenda Croes.  Tambe e miembronan cu tambe ta hasi 17 aña cu nan e luna aki, esta Yola Kock y Lourdes Croes.

   Na e momento nan aki e grupo ta conta ainda cu 17 miembro.  Y nan lo keda cu den Palmita di Oro te dia nan cera na December e aña aki.