Ady Thijsen a dirigi Parlamento durante tormenta politico na Aruba - *E desaroyonan rond di Marisol sigur ta tema cu no por keda atras sin mas - *Edgar Vrolijk na posicion central di democracia na momento crucial
ORANJESTAD(AAN)—Si realmente nos ta kere den democracia como base di gobernacion di Aruba, mester analisa e experencianan cu Ady Thijsen ta laga atras di e temporada cu el a fungi como Presidente di Parlamento.
Constitucion di Aruba ta exigi pa na e momentonan aki, Aruba tuma nota di loke a keda atras y di desaroyonan importante cu a tuma lugar durante e temporada cu Ady Thijsen a fungi como Presidente di Aruba, cu a conoce desaroyonan politico cu ainda mester haya aclaracion pa evita nan ripiticion.
Pa sostena democracia, semper nos a defende e lugar cu Parlamento ta ocupa y e respet cu mester tin pa Parlamento na prome lugar di parti di Miembronan di Parlamento cu ta e instrumentonan mas importante pa edifica of destrui e importancia constitucional di e unico Representacion directo di Pueblo di e Trias Politica.
Na salida di Ady Thijsen, kende tur hende mester admiti cu a dirigi Parlamento den e momentonan mas dificil cu Parlamento a conoce, mester analisa sucesonan relevante.
Con importante Parlamento ta na e pais, sigur a keda confirma dor di Betico Croes, kende for di Parlamento a dirigi e lucha di Aruba pa Status Aparte.
E voz di Aruba a resona na forma historico pa trece e cambio mas grandi cu Aruba riba su mes a logra riba tereno estatal den su historia y a haci cu porfin Aruba a haya su propio Parlamento cu ta eligi e Conseho di Ministro di Aruba.
Durante 2009 pa 2017 por a mira con Parlamento a perde su lugar ora e miembronan di Parlamento di Aruba a entrega Prome Ministro Mike Eman 1.6 Biyon Florin di Aruba, cu e por a uza sin control di Parlamento y awe Pueblo mester paga.
Ta durante 2009 pa 2017 a mira con Gobierno Mike Eman a haya sosten di Miembronan di Parlamento di AVP, pa trapa riba Parlamento y no solamente firma un acuerdo pa Citgo cu Nicolas Maduro pero hasta nenga di entrega e acuerdo aki na Miembronan di Parlamento cu tabata parti di oposicion.
Berguensa a cubri Parlamento cu durante e temporada 2017 pa 2021 a cera conoci cu sospecho cu e Vice Presidente di Parlamento Alan Howell lo a horta placa di Fondo di su Fraccion den Parlamento.
Durante 2017 pa 2021, Ady Thijsen como Presidente di Parlamento mester a enfrenta e circo di Marisol Lopez-Tromp cu a kibra cu e Partido cu a nombra su persona como Ministro y a causa un desaster den Parlamento pa e no baha.
Ady Thijsen a dirigi Parlamento di Aruba na momento cu Hulanda debi na e debe nacional cu Aruba a hereda na 2017 como parti di e crisis financiero cu Gobierno Mike Eman a crea, a pone supervision financiero cu ta mishi cu e trabou directo di Parlamento cu prome cu 2017 a conoce un mayoria cu a destrui e imagen di Parlamento.
Na 2021 Parlamento di Aruba a mira acusado di Husticia como Miembro di Parlamento, cu Ady Thijsen mester a guia den temponan pisa.
Awe Edgar Vrolijk ta asumi e responsabilidad di Parlamento como Presidente. E ta enfrenta un reto grandi na momento cu Aruba mester lucha pa su autonomia financiero cu mester restaura su autonomia estatal.
E integridad di Parlamento afecta pa presencia di Benny Sevinger, ta culmina desaroyonan bochornoso cu mester scrap for di posibilidadnan si nos ta kere den democracia.
Ady Thijsen a despedi pero na nos parecer e por keda un sosten grandi cu su conocemento cu el a acumula den e periodo cu el a sirbi Aruba como Presidente den situacionnan turbulento ocasiona pa payasonan politico cu a falta respet pa Parlamento.
Nos ta kere cu mester gradici Ady Thijsen pa e trabou cu el a presta pa Aruba.
Nos ta reconoce e labor cu ta spera Edgar Vrolijk como Presidente di Parlamento cu ta e Voz di Aruba, cu mester tin refleho di e moral halto di Aruba!
