ORANJESTAD (AAN) — Na un forma ferviente Aruba a traha riba un futuro nobo mientras mundo a conoce su retonan historico mas grandi di ultimo siglo.
Na 2023 Aruba mester sigui habri su paso pa futuro, cu lo depende completamente di e muchanan cu proximamente lo bolbe school pa continua of duna inicio na nan estudionan.
Futuro na e momentonan aki ta un reto riba tur tereno y sigur lo exigi hopi di e generacion di un mundo cu cambionan positivo grandi riba terenonan economico cu ta brinda labor, pero tambe cu retonan enorme.
Ta den sonidonan di problema y mas problema mundial, muchanan y hobennan lo mester scoge pa un futuro na man di expertonan riba tereno di educacion den un mundo cientifico cu ta exigi profesional riba tur tereno.
Kico cunuconan di Aruba lo produci pa hende come den futuro te e futuro di turismo expone na tanto problema, lo bira trabou di e muchanan cu na e momentonan aki ta gosa di nan vacacion en espera di e momento cu nan lo bolbe school.
Un responsabilidad nobo ta enfrenta comunidad cu mester produci pa futuro ciudadanonan cu mester por atende cu e herencia cu e mundo actual lo laga atras.
E generacion nobo lo mester traha den un clima cu a conoce cambio pero tambe lo exigi solucion riba tur tereno cu mester wordo maneha pa e hobennan.
DIARIO den e cuadro aki ta prepara pa presenta topiconan cu lo mishi directamente cu e retonan nobo di e generacion den un situacion global sumamente dificil.
Ya tur informacion ta indica con importante lo ta pa pafor di school educacion continua y muchanan y hobennan ricibi e asistencia di tur instancia.
Participacion di tur gremio lo bira necesario pa duna muchanan mas e sentido cu nan mester coopera den e construccion di e futuro den cual nan lo ta lider di e pais.
Analisis di perspectivanan lo wordo presenta pa asina conhuntamente sigui cana den direccion di futuro, cu lo ta den man di muchanan.
