Ministerio Publico ta refresca memoria
*Tin hechonan castigable cu ta para den Codigo Penal di Aruba
ORANJESTAD (AAN): Un boletin emiti Diaranson merdia door di Ministerio Publico, a indica cu media na Aruba ta mescos cu comunidad di Aruba hopi politiza.
No ta bacila pa expresa na un manera ofensivo y humiliante tocante personanan, tocante Polis, tocante LandsRecherche, tocante Ministerio Publico of tocante ken cu ta.
Libertad di expresion ta un di e principionan mas importante di un estado di derecho democratico.
Pensamentonan cu por ofende of preocupa otronan ta permiti. Di politiconan, agentenan policial, Recherchenan di LandsRecherche y miembronan di Ministerio Publico ta worde spera mas cu di cualkier otro ciudadano, pero no ta asina cu nan ta pafor di ley.
Libertad di opinion no ta sin limite. Bao condicionnan legal y estricto libertad di opinion ta limita.
Esaki ta regla entre otro den EVRM (Tratado Europeo pa Derechonan Humano). Aki ta trata por ehempel di hechonan castigable manera agitacion, menaza y e asina yama articulonan di insulto.
E hechonan castigable aki ta para den Codigo Penal di Aruba. Agitacion ta ora instiga hende pa haci algo cu ta prohibi. Door di agitacion un persona por pone ciudadanonan comete hechonan castigable.
Door di menaza un persona, ta caus’e sufrimento of violencia. Un insulto ta un expresion ofensivo cu ta atacha honor y bon nomber di hende.
Ora e tipo di mensahenan aki worde poni den medionan di comunicacion, por haci denuncia y si tin suficiente indicacionnan lo start un investigacion penal cu por hiba hasta na detencion.
Mester remarca cu, a base di ley civil por actua mucho mas efectivo contra e tipo di abusonan aki. Ora di comete hechonan castigable por trata tambe di un acto ilegitimo, caminda huez por (por ehempel) impone daño y perhuicio. Of un prohibicion pa publica.
Tin casonan conoci caminda hendenan a worde kita for di trabao pa nan doño di trabao. Tambe violacion di privacidad por hiba na un acto ilegitimo den ley civil.
