Na caminda pa clausura 2022 cu un otro “concierto di aña”!

Premio nacional y concierto homenahe pa Maybelline Arends Croes

ORANJESTAD (AAN):  Maybelline Arends-Croes, un di Aruba su ciudadanonan di mas legendario lo ricibi un homenahe dia 30 di november proximo durante e entrega di Premio nacional Crioyo di Oro.

            Por corda con aña pasa, Jossy Brokke tabata e prome pa ricibi e premio prestigioso aki durante un concierto sold-out, cual e aña aki ta premira di sigui e mesun rumbo.

            Motibonan cu e aña aki Maybelline lo ta esun pa ricibi e premio nacional y homenahe aki ta hopi. Banda di e hecho cu un cantidad grandi di publico general a nomina Maybelline como e proximo Crioyo di Oro, semper Maybelline tabata un maestra di musica masha keri y un artista excepcional cu tabata tin e formula perfecto pa lanta e mihor emocionnan den e ser humano.

Semper e tabata sa perfectamente con pa inspira, motiva y empodera nos comunidad cu e mihor cancionnan y letranan. Specialmente e miles di mucha y hobennan cu a haya les y a wordo impacta y influencia di e mihor forma posibel door di Maybelline.

            Awe, hopi di nan ta lidernan ehemplar den nos comunidad cu tin un aprecio y stimacion grandi pa nan maestra di canto y musica. Maybelline su dedicacion na trabao voluntario tambe ta impresionante y admirabel. Tur esaki, sigur lo haci cu e anochi di gala aki lo bay ta uno completamente bendi for di trempan.

            Durante e anochi aki un elenco extraordinario di e mihor artistanan lo bini hunto pa rindi honor na e legendario local aki durante un produccion musical espectacular.

            Nombernan cu por menciona ta entre otro Cesar Olarte, Grupo Melange, Rocco Franken, Gloria Vega, Rachel Kraaijvanger, Erika Giel, Edjean Semeleer y varios sorpresa musical grandi cu a wordo prepara pa deleite di Maybelline y e publico presente.

            Fundacion Go Cultura ta gradici tur persona cu a uni nan mes na e proyecto aki y ta trahando duro hunto cu nos fundacion pa Premio nacional Crioyo di Oro por ta un exito rotundo.

Gradicimento na miembronan di prensa cu ta brindando sosten valioso na e homenahe aki y pa comparti e noticia continuamente cu nos comunidad.