Dia Internacional di Idioma Materno
ORANJESTAD (AAN): Desde aña 2000 tin un dia internacional di idioma materno. Esaki a keda proclama oficialmente pa UNESCO na 1999. Idioma materno ta e idioma cu bo ta siña na cas como mucha; un otro palabra pa idioma materno ta bo prome idioma.
Segun cifranan di censo piloto 2019 (CBS Aruba), Papiamento ta idioma materno di 80% di Aruba su poblacion. E porcentahe aki ta encera tanto esnan cu ta papia Papiamento so na cas, como tambe esnan cu ta papia Papiamento banda di un otro idioma.
Ta calcula cu na henter mundo tin mas o menos 7.000 idioma ta existi. Di e 7 mil idiomanan aki, mas o menos 6.700 ta idiomanan indigeno. Segun estudionan haci, ta premira cu 40% di esakinan tin chens di muri prome cu fin di e siglo aki.
UNESCO ta desea di evita pa idiomanan bay perdi. Idioma ta producto di creatividad di e ser humano. Idioma ta herencia cultural di un pueblo. Diversidad linguistico ta parti di diversidad cultural.
UNESCO ta mustra tambe riba e importancia di siña prome den un idioma cu e alumnonan ta papia of compronde, specialmente den e prome añanan di scol. Despues nan por siña otro idiomanan cu tambe ta importante pa nan mes sigui desaroya, pa desaroyo di nan pais of region y pa e parti internacional. No ta e intencion pa un idioma reemplasa e otro.
Di e manera ey ta promove multilingualismo. Door di haya les den su idioma materno, mucha ta siña miho, ta siña lesa y skirbi miho y ta siña otro idioma miho tambe. P’esey e tema di UNESCO di e aña aki ta: Enseñansa multilingual ta un pilar di siñamento intergeneracional.
Na augustus 2024, e alumnonan di Aruba lo cuminsa siña lesa y skirbi na Papiamento den klas 1 di scol basico. Esaki ta idioma materno di 80% y alabes e idioma cu mayoria alumno ta papia of compronde, manera UNESCO ta indica.
E idiomanan Hulandes, Ingles y Spaño ta keda idiomanan importante y lo haya nan debido atencion tambe na scol. Entrante augustus e maestronan lo ofrece Hulandes cu un didactica di idioma stranhero. Esey ta encera un otro acercamento compara cu e forma tradicional.
Departamento di Enseñansa (DEA) a desaroya un metodo di Hulandes como idioma stranhero, specialmente dirigi riba nos alumnonan. Alabes DEA ta ofreciendo workshop na e maestronan di klas 1, pa nan ta bon prepara pa e cambionan entrante e aña escolar nobo.
Di e forma aki DEA ta contribui na un enseñansa multilingual, dirigi riba e idioma materno di e gran mayoria, preservando Papiamento como herencia cultural di Aruba y preparando e alumnonan pa futuro.
Pa mas informacion por acudi na nos websites www.ea.aw y www.papiamento.aw.
{gallery}Na augustus 2024, e alumnonan di Aruba{/gallery}
