Na Aruba tambe a detecta boternan di pindakaas Jif cu ta posiblemente contamina

Compania a recall casi tur boter di peanut butter Jif

ORANJESTAD (AAN): Tin hende na Aruba cu a detecta boternan di Peanut Butter di marca JIF, cu a wordo recalled na otro paisnan como cu nan lo por ta contamina cu Salmonella.

   DIARIO a nota cu mientras tanto Gobierno di Curaçao, y tambe Bonaire a emiti un boletin pa pidi ciudadanonan pa benta e posible boternan di ‘pindakaas’ di marca Jif afo, como cu nan lo por ta contamina cu bacteria di Salmonella.

   Gobierno di Bonaire a bisa cu si bo tin e producto popular aki di Jif na bo cas, check e prome 7 numbernan imprimi patras riba e boter.  Bo ta haya un number largo (13 cifra) bao di e fecha di caduca.

   Aki bo tin di check e prome 7 numbernan.   Check si e prome siete number ta finaliza cu ‘425’.

   E serie di productonan afecta ta di lot number 1274425 te cu 2140425.

   Na Aruba ya caba varios ciudadano a informa DIARIO, cu nan a descubri cu nan tin e boternan aki cu ta cay bao di recall den nan frigidaire.

   FDA di Merca ta conseha publico pa no come ni sirbi e peanut butternan aki di Jif.  E recall aki ta impacta diferente tipo di peanut butter cu e compania ta produci, incluyendo ‘Creamy”, “Crunchy”, “Natural”, y “Reduced Fat”.

   Un ciudadano a splica DIARIO cu den su frigidaire el a bin topa cu e faborito di su yiu muher teenager, esta “Jif Natural Honey Creamy”, y ora di a bay check e lot number, el a descubri e number “1305425”.

   Pues esey ta cay den e serie di numbernan recalled (tur number entre 1274425 te cu 2140425).  El a papia cu su yiu muher di esaki, y e dama hoben a bise cu unico cos raro cu el a haya ultimo dianan ta tiki diarea.  Pero e no tabata sa cu ta debi na e pindakaas aki.  El a bisa cu e ta gusta come e marca di Jif aki, como cu e ta worde produci cu honing.

   E ciudadano a bisa cu el a benta e boter, mitar yen den baki di sushi.

   Te cu Diasabra atardi, CDC di Merca a raporta cu tabatin 14 caso raporta di hende cu a bira malo, di cual 2 a worde hospitaliza.  E posible contaminacion aki no a produci ningun morto ainda.

   E peanut butter di Jif ta worde bendi na henter Merca, y tambe ta worde exporta pa e.o. Caribe.

   Si bo tin un boter di e peanut butter aki, por fabor bente afo mesora.  Laba superficie y cualkier cuchara of cuchiu cu a drenta den contacto cu e producto na forma extensivo, usando awa cayente cu habon.

   Yama Docter si acaso bo tin un di e sintomanan aki despues di a come e peanut butter aki, esta:

(*) Diarea cu keintura halto.

(*) Diareha pa mas di 3 dia cu no ta mehora.

(*) Diarea cu sanger.

(*) Hopi sacamento sin stop.

(*) Señal di dehidratacion, esta bo no ta urina hopi, boca y garganta ta seco, y bo ta sinti bo cabez ta draai ora di lanta para.

  Tabata Diamars cu e compania J.M. Smucker a anuncia un recall pa peanut butter Jif pa rond Merca debi na posible contaminacion cu salmonela.  Esaki ta valido pa un total di 45 tipo di producto.