Directie Natuur en Mileu cu datonan interesante:
ORANJESTAD (AAN): Directie Natuur en Milieu ta ofrece via nan Facebook Page informacion hopi interesante relaciona cu fauna di Aruba.
Recientemente nan a publica tocante Prikichi. E nomber cientifico pa Prikichi ta Aratinga pertinax arubensis. E ta un sorto endemico di Aruba.
E ta nombra como nos parha nacional. Su largura ta yega te 25 centimeter y por pisa te 100 gram. E color di e prikichi ta un variacion di e colornan berde, bruin y geel. Su cabes ta color bruin cu berde y poco geel rond di su wowonan. Su lomba y halanan ta berde scur y na e parti abou di su bariga ta un berde mas cla.
Na e halanan di e prikichi tambe tin poco color blauw den dje. Su pik ta shinishi te preto. Prikichinan ta uza casnan di comehein pa broei. Pero nan ta bula liber den e mondi den naturalesa.
Nan por solamente defende nan mes door di bula bay y tambe gritonan duro. Nan cuminda ta mas tanto simia di mata di Kwihi, Watapana y tambe fruta di cadushi.
E populacion di prikichi ta na peliger pa via cu e populacion di hende ta crece y pareu cu esey, nan demanda pa rosamento di tereno pa vivienda y otro desaroyo.
Na Aruba ta prohibi pa molestia, mata of tene esakinan of nan yiunan captura.
