*Logicamente e ta rekeri un maneho di gobierno
ORANJESTAD (AAN) – Hose Figaroa, Presidente di FTA, varios luna atras a declara pa DIARIO, cu un opcion cu tin pa haya trahado pa e sector horeca, pa minimiza e scarcedad cu tin aworaki, ta legalizando un grupo di personanan indocumenta cu ta biba caba na Aruba. Pero esaki tambe ta rekeri di un maneho. Den e entrevista aki cu DIARIO, Figaroa a reitera e mesun punto.
El a bisa cu si, por ehemplo, mester haya 3 mil hende pa traha y por logra legaliza 1500, cu ta na Aruba, e presion ta baha pasobra nan ta biba akinan caba, tin menos presion riba e parti di vivienda, pero toch mester tin un maneho.
“Mester tin un maneho di con nos ta bay legaliza hende. No ta djis bisa ‘tur hende cu ta biba na Aruba ta bira legal’. Mester wak kico ta e rekisitonan cu nan mester cumpli cu ne. Y rekisitonan realistico manera documentonan cu nan mester, cu kizas nan no por haya for di e pais cu nan a bin. Atrobe, e lo ta bon pasobra bo ta evita importa hende di mas”, Figaroa a indica.
El a agrega cu cifranan ta papia di 15 mil hende indocumenta na Aruba. E no ta kere cu por legaliza 15 mil hende, pero si legaliza 10% so, ta papia di 1500 persona. “E ora ey ta 1.500 hende menos cu bo tin cu importa. Nan tey caba, nan ta forma parti di nos economia, nan tin un cas unda nan ta biba, obviamente, pasobra nan no ta biba riba caya, y nan tin cierto forma di mantene nan mes na bida tambe, pasobra si acaso bo ta na Aruba y no tin ningun tipo di entrada trempan bo ta bay pasobra bo no por sobrebibi. Pero nan ta biba di algun forma.
Idea ta pa legaliza nan situacion na Aruba pero tur esey ta exigi pa di parti di gobierno bin cu un maneho duidelijk di ki ora si bo por legaliza y ki ora no. Y banda di esey, parallel bo tin cu bin tambe cu un maneho di importacion di trahado”, Hose Figaroa a reitera, agregando cu e rekisitonan cu nan tin cu cumple cu ne mester ta esnan cu e efecto pa nos economia ta minimo.
