Thomas Ruiz, Secretario di VRA:
ORANJESTAD (AAN) Thomas Ruiz, Secretario di VRA (Vereniging Rijscholen Aruba), den entrevista cu DIARIO a expresa cu, sigur, “handhaving” tin su rol. Den e caso aki, el a bisa cu mester tin mas control riba caminda.
“Nos ta conciente cu Cuerpo Policial tin un scarcedad den personal, pero nos a yega di duna varios solucion tambe con nan por bin na haya sosten pa control di trafico. Por ehemplo, nos a duna e personal cu ta controla bus cu tourwagen, of esunnan cu ta di Aruparking pa traha grupo autoriza pa concentra riba trafico. Si no bin control, e hendenan ta haci y deshaci manera cu nan kier”, Thomas Ruiz a señala.
E aspecto di cultura tambe ta hungando un rol den e trafico di Aruba. Esey por wak den e mentalidad con pa core auto, segun Ruiz.
“Nos tin un problema tambe cu mi a yega di trece varios biaha cu ta e Tratado di Ginebra cu nos tin. Manera ta conoci, e paisnan cu ta cay bao di e tratado ey por yega bin cambia nan rijbewijs di Aruba. Nos a haya nos cu un caso na unda cu un seña a cumpra su rijbewijs na Venezuela; nunca el a siña core auto. El a bin Aruba, el a cambi’e y despues a bin cerca nos puntra si nos por yud’e conoce e reglanan pa core auto mes. Pero e tin un rijbewijs di Aruba tambe”, Thomas Ruiz a relata.
Ruiz a relata cu e ultimo caso cu el a haya ta di un persona Asiatico cu a haya su mes den un lugar di accidente. “E alumno ta puntra nos e persona aki ora m’a haya accidente e no a domina ningun di e cuater idioma cu boso ta duna examen, pero toch e tin un rijbewijs di Aruba. Con por ta?” Thomas Ruiz a comenta y a bisa cu tur e cosnan aki ta cosnan cu ta sosode, e ta keda ripiti y cifranan ta mustra cu locual nos ta haciendo den e añanan aki no ta dunando su resultadonan manera mester ta, pasobra e no ta haya e seriedad y atencion cu mester.
“Y corda bon, e ta bay afecta nos economia. E ta cosnan cu mi ta bisando pa hopi aña, pasobra bo’n sa cuanto ta bay dura hende pa deliver nan producto, pasobra si bo tin un hende pa deliver producto bo mester busca un extra, cu ta extra costo. Y kico ta pasa? Cu e ta bay riba prijs di producto”, Thomas Ruiz, Secretario di VRA a señala.
