Tisa LaSorte, CEO di AHATA:
ORANJESTAD (AAN) Matutino DIARIO a entrevista señora Tisa LaSorte, CEO di AHATA, tocante e problema di hortamento riba pertenencianan di turista cu ta guest di hotel y esaki a cuminza crece desde 2024. Esaki ta sosode sea riba beach of den cambernan mes, y ta un problema dificil pa haya solucion. Y e tin na peligro e seguridad cu Aruba tin y, consecuentemente, Aruba su economia.
LaSorte a bisa cu actualmente tin un situacion dificil den e sector hotelero, na Palm Beach y Eagle Beach, cu tin algun actonan delictivo chikito unda cu tin gang cu algun hoben cu ta cana rond, ta busca pa horta sea den beach of den camber di hotel, y el a bira algo dificil.
“Nos ta mira si, cu polis ta tuma accion pero ainda e dificultad tey. Tambe nos ta bin cu mas hende ta keda drumi riba beach: hendenan homber drogadicto ambulante, cu aworaki ta bayendo den e direccion ey”, e dama a señala.
Pues ta problemanan cu ta crece y ta trece dificultad pa nos Industria, y tambe pa e personanan cu ta traha den seguridad den e hotelnan cu tin hopi mas asunto cu nan mester trata cu ne, pa trece e sector aki na un manera sigur.
“Pasobra nos tur sa cu nos economia tin un pilar grandi cu ta nos turismo. Y turismo su pilar na Aruba ta tres aspecto: nos beachnan, nos hendenan, y e seguridad cu tin na Aruba. Anto, si nos seguridad ta na peligro, nos economia ta na peligro”, Tisa LaSorte, CEO di AHATA a señala.
Señora LaSorte a menciona cu e relationship y dialogo entre AHATA, KPA, y Hospitality Security Foundation ta bon, y tambe tin Tourism Security Patrol cu ta yuda cu extra wowo. “Nan no ta polis, pero nan ta yuda cu extra wowo pa nan por mira y haya informacion cu nan por duna polis y polis por tuma accion tambe. Pues hunto asina nan por colabora cu otro, y e teamnan di seguridad den hotel mes y restaurantnan, nan tur tin extra wowo cu por yuda cu informacion cu por yuda polis pa tuma accion” LaSorte a reitera.
El a agrega cu tin preocupacion si, di cual AHATA tambe ta papia cu polis cu tambe ta preocupa y accion mester sigui pa por ta sigur cu por mantene e area di hotelnan sigur pa nos hendenan, pa e turistanan y pa e trahadornan di e sector unda miles di hende ta traha.
