*E variante por ta circulando na Aruba bao di e gruponan cu no ta vacuna - ORANJESTAD (AAN): Diabierna mainta, durante e conferencia di prensa di Crisis Team y Gobierno di Aruba, Sharline Koolman di Departamento di Salud a referi na e tema di e variante 'Delta'.
El a splica cu 'Delta' ta e variante cu a sali prome na India y Delta ta diferente na, por ehempel, esun Britanico cu aworaki ta wordo yama 'Alpha'.
E ultimo aki, e tempo cu el a sali, ya caba tabata tin miedo di dje pasobra e ta 50 % mas transmisibel cu esun original cu a surgi na Wuhan. Delta ta mas contagioso cu e variante 'Alpha' y esey kiermen cu e ta pega mas lihe. Pa e motibo ey varios pais a anuncia caba cu tin cu keda tira vista riba e variante 'Delta' kico e ta haci, a remarca.
Segun Koolman, na Aruba a detecta 'Delta' caba algun siman pasa. E ta presente na Aruba y door cu e casonan ta asina abao no tabata tin ningun caso mas. Ta garando tur e casonan, pero esey kiermen tambe cu den e tiki casonan positivo cu ta test, e chens pa gara e diferente variantenan ta bira menos.
E variante por ta circulando na Aruba bao di e gruponan cu no ta vacuna y ta asintomatico. E momento cu e variante haya un persona, un hende grandi cu pa un motibo of otro no por a haya e vacuna, e por haya e variante 'Delta' aki y e persona aki mas sigur sin vacuna ta finalisa den hospital y den ICU, e representante di DVG a expresa.
