Ta mes ekipo cu a logra acuerdo cu dictador Maduro ta bay Hues pa reconteo? - *Padushi y Papa di Mike a percura pa dictadura 12-8 contra e Arubiano den Antia - *Como dictador Mike a trapa riba leynan di Aruba ora el a kibra poder di Parlamento
ORANJESTAD—Na mayoria di momento cu Mike haya oportunidad pa habri su boca, e impresion ta wordo crea cu Aruba tin cualkier debe cu Mike of cu su famia.
Cu den AVP a crea un cultura di discriminacion caminda si bo no tin cierto nomber di famia bo no por ta na cabes di e partido, ta graba den historia di Aruba. E motibo pa e discriminacion aki ta desconoci pasobra francamente no por mira riba kico Mike ta basa su mes, ora e ta papia di su historia cu el a logra cambia na su beneficio.
Ora Aruba bolbe den su historia na Siglo 20, e ta topa cu e introccion di Antia Hulandes, cu tabata e nomber cu e colonia Hulandes di seis isla den lama Caribe, a haya.
Antia Hulandes tabata tin un bandera di seis strea. E anhelo di e Pueblo di Aruba tabata pa uno di e seis streanan aki, cu tabata Aruba, wordo kita for di e bandera.
E anhelo di Aruba tabata pa e keda den Reino Hulandes pero no como parti di e bandera Antiano.
Aruba a entrega e encarga na e welo y e tata di Mike Eman, cu tabata negocia na nomber di Aruba, cu a pone tur su confiansa den e famia di Mike Eman y a lucha.
E Arubiano a mira un luz na momento cu representacion di Aruba y di Curacao den e Parlamento di Antia tabata 8-8. Loke e Arubiano nunca a pensa, a sosode. E welo y e tata di Mike, a permiti pa Curacao haya 12 asiento den Parlamento di Antia y Aruba 8 asiento, loke a haci cu Aruba mester a baila riba musica Antiano.
Padushi y Papa di Mike Eman a traiciona e lucha pa separacion di Aruba. Nan a bay di acuerdo cu Hulanda pa Aruba bira victima di dictadura cu ta hancra den e formula di 12 representante di Curacao contra 8 representante di Aruba, cu a haci cu Aruba semper tabata den desventaha den e union Antiano.
Ora Betico Croes a bira parti di AVP, cu mester a busca un lider nobo, el a wordo discrimina y no por a aporta na su pais den seno di AVP pasobra e no a nace Eman.
Te awe si bo no ta Eman, bo no ta lider di e partido manera a keda demostra ora Tico Croes a pensa cu e por bira lider di AVP.
Ora Mike papia di dictadura, hende mester hari. Pasobra si tin un dictador, su nomber ta Mike Eman.
Si Mike no haya loke Mike kier, problema a cuminsa.
Pasobra Hulanda a bin splica cu e ta abusa di placa di Aruba, el a bay crea un spectakel di payaso den Fort Zoutman y hunga cu e ta muri.
Brasa y sunchi ta bira veneno su Mike no haya loke e kier, manera tur hende por observa. Respet ta termina, Mike ta dicidi pa e formulanan cu ta bay contra tur etica y hasta exigi Pueblo permiti Benny Sevinger traha como Miembro di Parlamento for di prizon. E Arubiano decente mester cera su boca.
Impresionante ta, con Mike ta rondona su mes cu hende cu ta bisa cu ley ta nan specialidad. Pero ta e hendenan aki a yuda Mike cera un contracto cu Nicolas Maduro contra interes di Aruba. Un contracto cu Mike a firma sin permiso di Parlamento cu e no a permiti manera ley ta exigi, tuma nota di su areglo cu dictador Nicolas Maduro
Mike y Nicolas Maduro a firma un documento den cual Mike ta trapa riba bienestar di Aruba. Cu otro palabra, Mike a traiciona interes di Aruba, despues cu el a abusa di placa d Aruba.
Awe Mike kier destrui trankilidad na Aruba pasobra e no a haya suficiente voto pa e bay termina su obra macabre como Prome Ministro di Aruba.
Pero kico Mike tin pa ofrece Aruba? 2009-2017 a duna prueba atrobe pakico e bandera di Antia a keda cu seis strea.
Traicion di e pueblo cu a kere cu padushi y papa di Mike lo a los Aruba for di Antia cu asina lo a keda cu un bandera cu cinco strea.
Traicion ta loke e Pueblo di Aruba ta experencia ora nan mira kico Mike a haci cu nan placa.
Traicion ta loke a pasa cu Nicolaas Maduro y traicion ta loke ta sconde den e dictadura di payaso di dos cara cu ta kere cu el a nace pa bira rey di Aruba.
