Na 2025 a dicidi pa haci un proyecto di mantencion preventivo den e careteranan

Lysander Wernet, di CIC NV Green Corridor:

• A introduci e sistema micropaving cu tin hopi beneficio 

ORANJESTAD (AAN)  Matutino DIARIO a entrevista Lysander Wernet, representante di e Compania CIC NV Green Corridor, ken a duna di conoce cu na maart ultimo, e compania a cuminza cu un tecnologia nobo pa Aruba, pero internacionalmente ta conoci caba.

“Nos careteranan ya tin algun aña, y nos ta corda cu na 2014 nos a inicia cu e proyecto na Barcadera, Seroe Teishi, y entre tanto ya nan tin dies aña di instalacion. Otro careteranan a wordo instala na 2016-2018, unda cu segun e contract cu gobierno por duna e mantencion na e careteranan te aña 2036, loke ta nifica cu e careteranan tambe ta forma parti di e mantenimento aki, unda cu e aña aki 2025, nos a dicidi di haci un mantencion preventivo cu un tecnologia cu a demostra caba, na otro paisnan, cu e ta funciona y e ta pa extende e pida util di e caretera, ora cu e ta den bon condicion”, Lysander Wernet a señala.

Wernet a indica cu e beneficionan ta hopi. Uno ta alarga e bida util pa otro seis of siete aña, dus e proyecto, aki seis of siete aña, lo pasa pa otro intervencion.

“Durante e añanan e careteranan ta cuminza haya su deterioro unda cu bo ta cuminza wak micro-fisuranan, e solo y awacero ta infiltra den e infrastructura y bo ta cuminza wak e skeur, despues buraco, desnivelnan, y loke nos tin cu evita ta cu e camindanan sigui deteriora y na e momento corecto, nos ta introduci e micro-pavement pa mehora su funcionalidad. Esey kiermen, por ehemplo, cu e parti unda cu e caminda ta cuminza bira liso, nos cu e micropaving ta zorg pa e bolbe bira rustico. Esey ta pa e parti di seguridad, pa e caminda por bolbe haya su beneficionan pa e trafico ta sigur”, señor Lysander Wernet a relata.

El a agrega cu otro beneficionan ta, por ehemplo, cu e sistema aki ta wordo poni cu asfalt frio. Esey kiermen cu e asfalt riba su mes ta contene un mayor cantidad di awa; un bez cu e caminda oxida of evapora e asfalt ta keda sinta riba e asfalt existente, pa proteha e asfalt pa e otro añanan.

“E intencion di e micro-pavement ta pa nos continua den e careteranan principal cu ta pertenece na Green Corridor, awo mes nos ta cuminza for di e rotonde di San Nicolas pa sigui den Bernhardstraat, te cu e cruzada di Julio’s Bar”, Lysander Wernet a splica.

El a agrega cu e intencion ta pa nan keda cla prome cu e cuminzamento di aña escolar nobo, cu ta dia 19 di augustus aki, y despues continua na e careteranan alternativo secundario, cu ta e caminda di Mariniers Kazerne, continua sigui den Savaneta, y termina banda di e rotonde di Pos Chikito.

Finalmente, e ultimo camindanan di Green Corridor lo ta for di Aeropuerto sigui pa e rotonde di Mahuma, Seroe Teishi, Kibaima y finaliza cu e proyecto na rotonde di Pos Chiquito. E proyecto lo wordo finaliza na October.