Na 2023 lo cuminza ehecuta e proyecto di Rodgers Beach

Minister Dangui Oduber:

ORANJESTAD (AAN) – Minister di Salud y Turismo a duna di conoce den conferencia di prensa Diahuebs, cu Gobierno a otorga, recientemente, un opcion na un inversionista desaroyador, cu ta bay construi un boutique hotel di 40 camber, situa unda antes tabata Nanki Country Club.

E mandatario a menciona cu esaki lo ta un bunita proyecto conforme gobierno su maneho y su vision, cu enfoke riba desaroyonan chikito pero di un nivel di calidad halto.

Minister Oduber a subraya cu esaki ta e vision cu gobierno kier hiba e añanan nos dilanti, teniendo cuenta cu e limitacion di terenonan cu tin disponible na Aruba. “Nos no kier mira desaroyo di hotelnan grandi mas, pero naturalmente nos ta sostene e proyecto di Secrets Hotel, cu a bira e anker y por mira despues di a anuncia e proyecto aki, cuanto inversionista desaroyador a acerca Gobierno pa diferente desaroyo den e area di Seroe Colorado. Nos ta sinti cu gobierno mester haci su parti tambe, mustra su boluntad di mehora e infrastructura, upgrade henter e area, y prepara esaki pa e desaroyo cu ta na caminda pa San Nicolas”, e dignatario a acentua.

E mandatario a agrega cu si tur cos ta bon, pa 2023 pa medio di un combinacion di fondonan di TPIF, ATA y Gobierno, lo cuminza cu ehecucion di e proyecto di Rodgers Beach cu tambe lo bira un bunita proyecto, unda lo hala (move) e caminda existente pa asina por amplia e beach y haya mas espacio pa pueblo y turismo. Tambe lo traha facilidadnan di baño y amenities den e proyecto aki.

E dignatario ta spera cu pa final di 2023 lo a ehecuta ambos proyecto, esta Baby Beach y Rodger Beach.

Minister Dangui Oduber a menciona cu SNBA ta sostene e proyectonan aki, y asina gobierno tambe ta demostra su compromiso cu e Distrito di San Nicolas. E mandatario a subraya cu ya caba gobierno a inverti den drechamento di e pier di Rodgers Beach. Nan ta drechando na e momentonan aki e trapi y si tur cos ta bon pa mas tarda pa fin di Mei e trapi aki lo wordo entrega. E ta un proyecto chikito pero cu un impacto grandi, segun e dignatario.

Tambe a lanta San Nicolas Business Center cu ta e oficina di ATA, cual ta haya hopi bishita di turistanan interesa den sa kico San Nicolas ta ofrece.