Dies aña pasa e porcentahe tabata 11%
ORANJESTAD (AAN) – Director di AZV Edwin Jacobs, den conferencia di prensa cu a tuma lugar Diaranzon di e siman aki, a toca un total di nuebe tema, relaciona cu cifranan cu a cera na 2022.
Un di e temanan aki ta envehecemento cu nos poblacion ta pasando den dje, y cu tin su impacto riba e fondo di AZV.
“E ta un realidad cu e gastonan pa un persona den su trayecto di bida, ta cuminza ora e ta nace. E ta un gasto relativamente halto y despues di 2 pa 3 aña ta baha bek na un nivel, y e ta subi bek ora e hende muher ta den edad fertil, door di embarazo. Pa hende homber e ta keda un poco mas abao, den caso di accidente e ta aumenta pero despues di 35 pa 40 aña gradualmente e gasto promedio ta aumenta, segun edad ta subi”, Ir. Jacobs a señala.
El a agrega cu te banda di 80 pa 85 aña e gasto ta estabiliza y kizas ta cuminza baha pasobra personanan na e edad ey ya a pasa den tur sorto di malesa y na cierto momento un mas no ta afect’e.
“Kico nos ta mira den e caso di Aruba? Si dies aña pasa 11% di nos aseguradonan tabata den edad di 65 plus, nos a cera 2022 cu 17% di nos aseguradonan tin 65 aña y mas” Director di AZV a señala.
Pues, den diez aña por mira un aumento relativo di mas di 50% den e grupo di asegurado 65 plus.
“Pa nos haya un idea di kico e ta nifica den comparacion cu otro pais, na Hulanda di 20% di e poblacion di aseguradonan hulandes nan edad ta di 65 aña of mas. Na Curacao na aña 2021 casi 20% ta na edad di 65 aña of mas. Y e cantidad den paisnan occidental ta aumentando, entre otro debi na e cuido medico cu nos ta brindando e ultimo 50 pa 60 añanan”, Ir. Jacobs a relata.
