E resultado ta culmina cinco aña despues di entrada di e proyecto --- *Pueblo a haci debenan grandi a base di un promesa economico falso --- *Na 2021 Aruba y Arubianonan cu peso financiero sin suficiente entrada
ORANJESTAD(AAN)—Na 2017, Aruba lo mester a cuminsa gosa di e prome parti di e recuperacion economico, cu na 2016 a wordo priminti na Pueblo di Aruba ora a introduci e proyecto di Citgo, cu tabata encera peligernan pa Aruba.
Rapportnan oficial a papia directamente di e peligernan aki, di cual Gobierno Mike Eman no a haci caso.
Peligernan cu no por a wordo discuti manera Ley ta exigi den Parlamento, ya cu ta solamente e partido di Gobierno Mike Eman tabata na haltura di e acuerdo cu a wordo firma cu Citgo na forma di secrecia pa otro partidonan den Parlamento.
Gobierno Mike Eman y e miembronan di Parlamento di AVP, a trapa riba ley y a nenga di tuma autorisacion di Parlamento prome cu a firma e acuerdo pa despues nenga di duna Oposicion di Parlamento e acuerdo cu nan a firma.
Te awe Aruba ta biba cu resultadonan di e momento y hustamente loke Ley ta evita pa pasa cu Pueblo, cu ta bira victima di actonan contra ley di gobernantenan y Parlamento manera a pasa na 2016 ora AVP den Gobierno y Parlamento a trapa riba ley.
Informantenan ta hiba DIARIO awe atrobe na e momentonan aki, pasobra e acuerdo aki ta responsabel pa loke awe ta pasa na Aruba, cu for di 2014 a wordo hinca den situacion di bancarota dor di AVP, manera supervision Hulandes ta proba.
Dia 2 di mei 2015, Hulanda a deshaci di autonomia di Aruba cu introduccion di CAFT, a base di e desastre financiero cu a wordo crea dor di Gobierno Mike Eman.
Pueblo di Aruba na 2016 a wordo ciego dor di firmamento di un acuerdo entre Gobierno Mike Eman y Nicolas Maduro pa Citgo, na momento cu ya Nicolas Maduro a destrui e base democratico y economico di Venezuela y Gobierno Mericano tabata conduci investigacionnan serio contra Citgo, e baca di lechi di cual Nicolas Maduro tabata saca placa.
Mientras ya Aruba tabata bou supervision Hulandes, e Acuerdo cu Citgo a haci Arubianonan kere cu economia lo a crece cu 15 porciento manera Mike Eman a priminti.
Den e temporada aki, cu Aruba tabata tin un debe grandi pero tambe debenan relaciona cu e fondo di 1.6 Biyon cu a keda scondi den lachi di Benny Sevinger, Arubianonan a cuminsa haci debe en espera di placa cu Citgo mester a produci.
Na final di 2017 tabata obvio cu Citgo lo no a bini Aruba, cu a perde confiansa den e Gobierno di Mike Eman.
Na 2018 un epoca nobo a cuminsa pa Aruba, cu mester a tuma medidanan pa sobrevivi.
Hunto cu expertonan DIARIO a analisa e situacion na inicio di 2018, ora Aruba mester a tuma medidanan pa por a paga debe nacional, proyectonan PPS pasobra Aruba no tabata tin placa.
Pues e Arubiano cu a kere den e promesa di crecemento economico cu 15 porciento cu entrada di Citgo, a wordo confronta cu medidanan pa evita cu Aruba lo wordo declara bancarota a base di e debe nacional y tur otro compromiso cu Gobierno Mike Eman a laga atras.
Na e momentonan aki, cantidad di empresa y Arubiano a cuminsa confronta problema financiero serio.
Hopi Arubiano cu a cumpra auto, a cuminsa traha cas entre otro proyectonan financiero personal y hopi empresa cu a amplia negoshi pa motibo di Citgo, a haya nan mes den problema.
Turismo a haci cu hopi hende a busca un trabou extra pa aumenta entrada mientras como pais Aruba mester a baha tur su gastonan.
Ora Pandemia Covid-19 a dal Aruba, tabata tin instituto financiero cu a duna un aliento. Pero esaki no ta den tur caso.
Awe DIARIO a ricibi confirmacion di diferente contacto cu tin informacion concreto, cu trahadornan Arubano tin debenan di sigur hipoteca cu mester paga.
Aruba a sufri un caida progresivo dor di medidanan financiero cu mester a tuma na lugar di crecemento economico cu Gobierno Mike Eman a priminti a base di e acuerdo secreto cu Nicolas Maduro.
E situacion social na Aruba ta doloroso ya cu na Aruba por papia di un “double hit” riba entrada personal y di e pais.
Awe Aruba ta bolbe na incertidumbre mundial, despues cu durante 2017 Aruba a biba den e incertidumbre crea pa Citgo, cu a kibra stabilidad financiero y economico di e pais.
