Segun Minister di Finanzas Xiomara Maduro:
ORANJESTAD (AAN) – Minister di Finanzas Xiomara Maduro, den conferencia di prensa Diahuebs, a comparti e cifranan mas importante di Pais Aruba, pa loke ta concerni presupuesto 2023.
E mandatario a reitera cu Aruba tin un deficit, cual a keda den 25 miyon florin, cual ta 0.4% di Aruba su GDP.
Riba diferente grafico, Minister Maduro a duna un bista di locual ta e entrada di Pais Aruba.
“Nos lo conta e aña aki cu 1.532 miyon florin na entrada, y gastonan ta premira di bay core den 1.057”, Minister di Finanzas a splica.
El a agrega cu importante tambe ta pa mira e gastonan di personal, cu ta bay na 459 miyon florin.
“Ta bay tin 217 miyon, pa locual ta gasto di servicio y producto. 250 miyon pa loke nos ta bay paga na interes pa e debe cu a wordo acumula y tambe tin 214 miyon pa loke ta subsidio cu gobierno ta brinda, y tambe tin locual ta bira e ora ey na entrada.
Por wak cu tin 468 miyon florin na impuesto directo; den impuesto indirecto nos lo conta cu 684 miyon florin y gobierno ta premira 20 miyon florin pa loke ta concerni inversion y tambe pa fianza di estudio, tin 26 miyon florin cu ta aloca pa esaki”, Minister Maduro a duna di conoce.
E dignatario a informa cu e necesidad financiero pa e siguiente aña ta 1.414 miyon florin.
“Y akinan, nos ta tene cuenta tambe cu locual ta e debe cu nos a acumula cu Hulanda e ultimo tempo aki. Pa compronde e situacion ta importante pa tira un bista riba kico ta e impacto riba nos finanzas publico”, Minister Xiomara Maduro a bisa.
Via grafico ta mustra e debe acumula di 2019 pa 2022 y tambe loke a wordo produci como pais, pues e GDP.
“Por wak cu prome cu e pandemia, esta prome cu 2020 bo ta wak cu loke nos ta produci como pais, nos GDP, ta mas halto cu locual ta nos debe, y djey bo ta wak e impacto severo cu Covid-19 tabata tin riba finanzas publico, caminda cu nos GDP a cay grandemente. Nos a cay cu un tercer parti di nos economia door di Covid, y e debe a subi tambe”, segun e dignatario.
Na cierto momento na aña 2020, por mira cu Aruba a drenta den un realidad financiero nobo, unda cu e debe ta mas grandi cu e economia di nos pais. “Esey ta trece bo den un situacion hopi vulnerable como pais, pasobra bo economia a keda bao bo debe, cu ta mas grandi cu tur locual cu bo ta produci, pues e GDP di bo pais”, Minister Xiomara Maduro a remarca.
