Pakico den empresa priva corupcion y mal maneho ta menos facil?
*Cuanto hende cu hamber por a come cu placa pa investigacion?
*Corupcion ta exigi gastonan enorme den un mundo di problema
ORANJESTAD(AAN)—Un ola di problema a ataca mundo y asina tambe Aruba, cu ya tabata den problema serio pa e maneho di abuso cu a wordo hiba for di 2009 pa 2017 ora wowo di Pueblo tabata tan cera, cu no por a mira e bofon di e palabranan cu “orguyosamente lo paga e debe nacional”.
Awe cu hunto cu henter mundo Aruba ta den problema social serio despues di Pandemia y ainda den Guera di Ukraine den un mundo insigur, Aruba mester haci su mes e pregunta, cuanto placa e ta gasta na casonan contra politiconan acusa di corupcion.
Con por abusa di Pueblo, kibra ley pa hunga cu sentimento di Pueblo ora ta spart placa, ta bini dilanti den e Rapport Bo Aruba cu aparentemente no por wordo persigui.
Loke si ta pendiente ta e rapport di Refineria di Aruba pa no papia mes di investigacionnan cu ya ta un realidad of a resulta den caso den Corte pa un Pueblo paga.
Cuanto hende por a come cu e placa cu Aruba mester gasta pa asina por a tene e huicio di “Avestruz’? Cuanto tempo Polis mester a traha cuanto hora, pa por a entrega tur prueba cu den un caso asina ta determina si Husticia por wordo haci of no?
Cuanto Recherche, cuanto hende cu mester brinda asistencia na e trabou investigativo di Ministerio Publico, mester wordo paga for di e fondonan cu Aruba tin na su disposicion y cu cual mester duna asistencia na un comunidad cu tanto problema social?
Ora leza rapportnan internacional cu ta adverti pa e situacion mundial, por cera conoci cu e haltura di gastonan di gobernacion den e tempo cu ta conduci na recesion na 2023, cu cada dia ta bini cu mas siguransa.
E situacion financiero cu cual Aruba a wordo confronta na 2017, ta un abuso contra e Pueblo di Aruba pero mas grandi ta e abuso di casonan cu Aruba mester paga pa asina investiga corupcion politico y percura pa tur hende paga pa loke nan a haci contra e Pais y contra e Pueblo di Aruba, cu ta victima directo di mentenan corupto.
Mientras Aruba ta den negociacion cu Hulanda, cu tin Aruba bou supervision despues cu Gobierno Mike Eman a zink Aruba financieramente, Aruba mester paga e gastonan di e Caso den cual Benny Sevinger mester splica kico a pasa cu terenonan di Aruba, cu segun Husticia ta fuentenan di lodo.
Aparentemente no ta parada di Carnaval pero parada politico tin pa sala di Corte di Husticia, cu mester percura pa tanto gasto.
Pa trata un caso politico, mester busca Huez for di otro pais. Ta costa placa pa entre otro estadia y permanencia mescos cu buelo pa Aruba.
Un batayon di hende mester traha overtime pa por atende cu casonan nunca visto na Aruba.
Nomber di Aruba cu ta asina importante den un tempo di recuperacion, ta wordo tira den lodo cada bez cu atrobe tin un caso di politico cu placa di Aruba.
Pakico den sector priva ta menos facil pa abusa di un pais? Simpel. Pasobra e caminda pa tira hende cu horta, cu comete acto di corupcion na empresa priva, ta mucho mas facil cu den e mundo di gobernacion.
Politica demasiado bez ta un inspiracion pa hende cu no kier traha y gana nan placa mescos cu tur otro hende.
Cuanto politico di Aruba cu e cantidad di habitante cu Aruba tin, durante Siglo 21 ya a haya nan mes den problema cu husticia? Ta normal?
Ta normal cu den un situacion cu Pueblo no sa con pone cuminda tur dia riba mesa, Benny Sevinger mester atende cu Husticia pa placa bruto cu lo a circula na forma ilegal?
Ta normal cu Benny Sevinger, ta den Parlamento ta gana cantidad di placa y ta exigi tur informacion cu e kier, mientras Corte di Husticia ta atende cu su persona den un caso tan costoso pa Aruba?
Alan Howell mester aparece den corte di Husticia y awor Marisol mester fungi como testigo. Tin algo di Marisol tambe na caminda segun rumor cu ta circula?
Caso Otmar Oduber ta sigui den actualidad.
Awor kico e Arubiano cu ta traha dia y anochi pa por mantene su mes y su famia mester haci? Kico ta pasa cu su placa?
E mester sigui paga pa un batayon den Ministerio Publico? Of Aruba mester bira un republica di banana caminda tur politico cu ta capaz pa manipula hende, por crece y biba dushi mientras Pueblo ta hoga den problema?
Tur partido, cu ta e vehiculo pa Aruba haya gobernacion, tin e deber pa cera porta pa corupcion y practica control di nan miembronan, cu nan ta entrega puestonan di poder segun e sistema politico di Aruba.
