Musical “Planta awe cosecha mañan” a yena escenario di Cas di Cultura cu arte, briyo y talento!

Por corda riba e entrevista cu Seccion Hubentud den Movecion a realiza cu e docente di CKV,  na Maria College Mavo, Ferdinand Franca, cu tabata preparando e Musical “Planta awe cosecha mañan”.

Un entrevista yena cu entusiasmo pasobra e Musical tabata tanto pa celebra 80 aña di Maria College Mavo (celebrando Arte) pero tambe dedica na un baluarte di musica na Aruba, cu ta señor Vicente Ras, tocador di tambu.

Pues asina a sosode. Dia 8 y 9 di April, Cas di Cultura a bisti di luho cu un cosecha di talentonan hubenil, unda a participa 50 hoben studiante, alumno y ex-alumno di e scol, y tambe algun docente a join cu nan riba escenario. Un obra musical cu a encera teatro, baile, musica y arte visual, yena cu gracia y colorido, desbordando arte, talento, alegria, y cu hopi espectador a gaba masha hopi mes y hasta tin e deseo pa e ripiti.

E Musical aki tabata tin e meta di rebiba teatro na Aruba, y el a wordo presenta den colaboracion cu Fundacion “CCCA” (Cultiva, Cosecha, Conserva Arte) y hunto cu Maria College Mavo. 

Un tema interesante a wordo presenta cu ta e cultura y tradicion di Aruba, y a enfoca riba temanan di e hobennan di awendia, unda e hoben a enfrenta e pasado y futuro, bek den e epocanan 50, 60 y 70 cu miras riba un futuro di 25 of 30 aña despues, unda por a mira con e famianan tabata biba prome y con e muchanan a wordo lanta.

Seccion Hubentud den Movecion ta expresa su palabranan di pabien tanto na Ferdinand como na Maria College Mavo, Fundaccion CCCA y tur participante cu a briya riba escenario den Cas di Cultura e dos anochinan ya menciona.