Riba Dia di Betico
ORANJESTAD (AAN): Diadomingo 25 di januari, Dia di Betico, lo tin un presentacion hopi interesante na Museo Arqueologico Nacional Aruba (MANA) presenta door di arkeologo di nan, esta señor Harold Kelly.
Senor Kelly pa hopi aña a traha riba un investigacion riba elementonan climatico desde e prome hendenan cu a bin biba na Aruba y con nan a experiencia esaki y con el a desaroya su mes. Cu elementonan climatico, señor Kelly ta referi no solamente na e biento y solo, sino tambe e procesonan cu ta integra.
E sistema natural completo cu ta inclui tur e elementonan cu hunto den un forma multidirectional ta intercambia cu otro cu ta resulta den e bida cu tin riba nos isla specialmente e tipo di biba, tipo di recurso, e momento cu nan ta presente y con esaki a dicta e bida riba e isla specialmente den e prome etapa di bida riba nos isla. A base di esaki, e ta conclui su investigacion cu loke nos mester tene cuenta cu ne pa futuro.
Señor Kelly ta invita pueblo di Aruba en general na e presentacion interesante aki na Mana diadomingo Dia di Betico. E prome presentacion lo ta di 11:00 am pa 12:00 pm y e di dos lo ta di 1:00 pm pa 2:00 pm. Señor Harold lo ta presente durante e dia tambe pa contesta pregunta y duna mas informacion.
