AMSTERDA(AAN): E aña aki ta bay ta di 10 aña cu Amsterdam ta bay organiza un recepcion special pa e studiantenan nobo di Corsow, Aruba, Bonaire, St. Maarten, Saba y St. Eustatius.
E aña aki e actividad ta bay tuma lugar riba Diahuebs dia 21 di October.
E recepcion di 2020 no por a continua debi na e crisis di Coronavirus y pesey hobennan cu a cuminza cu nan estudio na 2020 na Universidad, Hogeschool of ROC, tambe ta bon bini.
Municipio di Amsterdam ta organiza e bon bini oficial aki desde 2011.
Cu e encuentro e muicipio ta spera di duna e hobennan un bon comienzo.
“E ta algo bastante impactante pa na un edad asina hoben laga bo cas y famia atras pa un estudio na Hulanda”.
No ta un sorpresa cu esaki no ta algo facil, pero e studiantenan a laga sa cu nan tin hopi gana y confianza, segun e municipio.
E programa di dia 21 di October ta bay ta uno varia, cu presencia tambe di e gabinetenan di Ministernan Plenipotenciario di Aruba, Corsow y St. Maarten.
E bestuur di ciudad di Amsterdam tambe ta bay ta presente.
Colegio di Amsterdam ta spera cu e studiantenan lo haya nan caminda y cu nan lo contribui na locual ta haci Amsterdam locual e ta.
“Ta bunita pa haya algo for di e ciudad, pero ta mas bunita pa duna algo bek”, segun e municipio.
Cera conoci cu Anton Erasmus!
Augustus cu a pasa organizador di e encuentro Tanja Fraai a topa cu algun di e studiantenan Caribense cu a yega Hulanda pa sigui cu nan estudio.
Un di nan ta Anton Erasmus di Aruba di 19 aña.
El a logra gana un camber den un asina yama cas di container den Zuiderzeeweg den e parti di Amsterdam yama Zeeburg.
Durante e prome simannan Anton tabata basta ocupa cu organiza tur cos den su camber y verf e murayanan.
E ta bay studia International Business & Management na Hogeschool van Amsterdam.
“Mi gusta Amsterdam pasobra e ta dushi druk”.
Banda di esaki mi gusta e canalnan di awa y e hendenan cu ta biba aki.
Mi ta spera cu mi ta bay logra haya mi propadeuse den 1 aña, segun e Arubiano.
El a bisa si cu mester tin tempo pa siña conoce hendenan nobo, pasobra no ta bon pa keda den e criculo Caribense so.
“Ora di haci deporte rapidamente bo ta conoce hendenan nobo y pesey mi kier bira miembro di un scol di boxeo”.
Dimes mi kier bay wak un wega live di Ajax, segun Anton.
El a splica cu e no ta kere cu e lo bay Aruba pa Pasco.
Segun e studiante el a tende for di hopi studiante ta cu e mihor cos ta pa keda por lo menos 1 aña na Hulanda prome cu bo bay bek Arunba, sino facilmente bo lo por haya heimwee.
El a bisa tambe cu banda di su estudio e ta bay busca un trabao, quizas na un servicio di delivery.
Su intencion e ora ey ta pa cumpra un motocicleta of un bicicleta barata.
