Minister Glenbert Croes:
ORANJESTAD (AAN) – Minister di Labor, Energia y Integracion, señor Glenbert Croes, a duna informacion den conferencia di prensa di Gobierno, dialuna 29 di Augustus aki, tocante e dos parkenan di Molina di Biento, cu lo wordo instala na Aruba.
Tabata presente Anthony Rojer, Managing Director di Utilities Aruba N.V., Alfredo Koolman, Chief Executive Officer WEB Aruba NV y Albertico Koolman, director interino di NV Elmar.
Minister Glenbert Croes a cuminza bisando cu mundo, na e momentonan aki, ta para dilanti decisionnan crucial cu mester wordo tuma, pa salba economia di e paisnan y tambe pa scapa nos planeta.
E mandatario a señala cu despues di e crisis di e pandemia, problemanan geopolitico y guera, a conduci na un crisis di energia cu, na mesun momento, a causa un inflacion cu ta wordo yama “energy inflation” cu ta ocasionando un impacto economico negativo, rond mundo.
E inflacion aki a subi prijs di tur cos den tur pais, y aworaki, combina cu e crisis climatico cu ya tabata formando su mes durante e ultimo añanan, a causa efectonan devastador di cambio climatico den varios pais: ola di calor, secure, y awor transporte via rionan na Europa y Asia ta paraliza pa motibo cu rionan ta secando di subida na nivel di lama.
Minister Glenbert Croes a subraya cu Aruba, manera nos tur sa, a wordo devasta pa e pandemia di Covid-19. E mandatario a bisa cu segun expertonan, Aruba a keda afecta economicamente na un forma mas severo cu tur otro pais na mundo, pa motibo cu nos tin solamente un pilar economico, y husto awo cu Aruba ta recuperando grandemente su turismo, y e economia ta generando empleo atrobe, pa cada famia por recupera su bienestar, tin guera. Kiermen, crisis y mas crisis, segun Minister Croes a subraya.
El a agrega cu Gobierno ta monitor tur e crisis aki di cerca, y companianan di utilidad, manera ta conoce, ta absorbe mas cu nan por di e impacto di aumento di costo di energia. Sinembargo, pa nan por sigui opera, pa Aruba como pais por sigui funciona y desaroya, e tarifa mester a wordo ahusta cu menos efecto inflacionario y mas social posible.
E mandatario a señala cu, afortunadamente, Gobierno di Aruba ya tabata tin un plan di energia cla, cual ta inclui reduci e dependencia di HFO (heavy Fuel Oil) y expande mas e capacidad di produci energia di biento, cu ta supla constantemente, y tambe genera mas energia di solo.
