DIARIO a bati alarma pa e realidad den region directo di Aruba
*Europa y Estados Unidos conoce e situacion doloroso y peligroso
*Hamber y persecucion mihor aliadonan di criminalidad mundial
ORANJESTAD(AAN)—Atrobe Aruba a wordo confronta cu un cantidad grandi di persona cu na forma ilegal a trata di drenta Aruba via lama.
No ta hopi tempo pasa, cu nos a bati alarma pa un peliger cu ta aumenta rond mundo, cu a demostra di ta incapaz pa atende problemanan social serio cu ta wordo uza dor di mundo criminal.
Na nivel internacional, sigur na Merca y na Europa, por tuma nota di e aumento drastico di refugiadonan, cu ta busca un lugar di permanencia nobo.
Na Hulanda por papia di un crisis ya cu centronan cu ta brinda espacio na refugiadonan, ta yena mientras Husticia ta na haltura di e forma cu ilegalidad ta infiltra den refugiadonan social.
Desesperacion humano ta uno di e fuentenan mas grandi di criminalidad. Hamber y persecucion politico ta motibo mundial di entre otro prostitucion, cu na su turno ta un fuente di criminalidad di tur tipo.
Un grupo di refugiado ta atrae otro y hopi hende ta entrega nan ultimo posesionnan pa nan por subi abordo di un barco peligroso y asina yega un pais manera Aruba, caminda nan ta busca un forma pa nan come y tin un dak riba nan cabez.
E sumanan cu hopi hende cu ta pone nan bida na riesgo pa por huy for di nan realidad mester paga, ta hustamente e motibo cu nan ta entrega nan mes na criminalidad, cu ta duna nan e placa of oportunidad di scapa di realidad di nan pais.
Un bulto di droga cu nan ta transporta, ta valioso. Parhanan cu hende ta cumpra na Aruba, ta posesion di esnan mas pober den comunidadnan caminda hamber y persecucion ta un realidad horibel.
Con hende ta biba na cantidad di pais grandi cu, sinembargo, conoce pobresa absoluto?
Hasta choza ta bira palacio den realidadnan, manera nos a scucha di boca di refugiadonan social cu a haya oportunidad di bandona e situacionnan inhumano cu nan a conoce.
Pa tanto cu ta huy di nan pais, un cama riba traha di piedra y santo ta loke ta nan lugar pa drumi den loke no por yama cas, ni sikiera choza.
Situacionnan espantoso, cu ta produci cantidad di enfermedad pero sigur hamber y desesperacion.
Transporta droga, arma y tur loke ilegalidad ta haci atractivo pa cierto grupo, ta e forma pa un grupo di hende desespera scapa di nan realidad.
Con ta soluciona e problema di refugiadonan cu ta prefera di bira criminal, bay den prisonnan caminda nan tin un dak riba nan cabez y cuminda pa come?
Mundo ta busca un contesta y Nacionnan Uni conoce cantidad di plan. Pero e plan mas importante cu ta atende cu e origen di tanto desesperacion humano, ta keda un deseo ferviente di tur hende.
Mientras no atende cu e causantenan di tanto problema social, di dictadornan cu ta horta placa di nan pueblo, nada ta socede.
E prome problema grandi mundial ta cu dictadornan ta haya oportunidad di opina na foronan mundial, manera Nacionnan Uni, cu no ta lanta para por ehempel contra un Nicolas Maduro, cu awe ta uni cu un presidente Colombiano, cu tabata un gueriyero.
Comunidad mundial mester actua contra abuso di hende dor di dirigentenan di paisnan manera Haiti, caminda e situacion a pone cu muchanan no por bay school ainda na September pero lo habri na October, segun ultimo plannan.
Mientras mundo ta incapaz di lanta para contra origen di desesperacion humano, mundo lo sigui conoce loke ta afecta Aruba, cu ta hendenan cu ta pone nan bida na riesgo pa alcansa un pais liber manera Aruba, caminda nan por recobra nan balor humano.
