Mundo di Enseñanza ta yora fayecimento di un gran personahe

Randolf Vrolijk ta bay laga un legado atras

ORANJESTAD (AAN): Fin di siman e noticia tristo a plama, cu un di e expertonan local den asuntonan di Enseñanza y Opleiding riba e isla, esta Randolf Marlon Vrolijk conoci pa tur hende como ‘Meneer Randolf’, a fayece despues di su lucha contra dificultadnan cardiaco.

   Den un instante, Aruba a perde un persona grandi kende pa hopi aña a duna su bida y alma pa engrandece Enseñanza na Aruba.  E amor aki a crece, for di tempo cu el a cuminza traha como docente.

   Randolf Marlon Vrolijk a nace na Aruba dia 13 di Maart 1973, pues tin 53 aña di edad.

   Na e.o. Colegio Nigel Matthew, meneer Randolf a duna hopi inspiracion cu su lesnan di KGL y Godsdienst.  Su forma di atende hende na un estilo humano, ta wordo recorda semper.  Debi cu e tin pasion pa Enseñanza, semper e tabata purba na yuda esnan cu ta cayendo atras den nan lesnan, y siña nan tur clase di triki y forma con pa sigui focus durante lesnan.  Su guia y inspiracion ta algo cu centenares di studiante lo keda corda di dje.

   Den poco palabra, Meneer Randolf ta un docente streng, pero cu empatia pa sigui yuda, pusha, y keda laga studiantenan acumula perseverancia pa nan sigui siña, bay dilanti, y finaliza nan estudio.  E tabata yuda semper den busca forma pa mas y mas hende educa nan mes, sin importa edad.

   Pesey mes el a bira hopi conoci rond di Aruba, pa su forma di dirigi Fundacion Ense؜ñanza pa Aruba (FEPA).  FEPA a wordo estableci na 2007 y a wordo reconoci oficialmente pa pais Aruba desde 2019. E Fundacion tin como meta pa promove y stimula educacion di adultonan na Aruba, pa asina mehora e calidad di bida y combati pobresa, desempleo y criminalidad. Meneer Randolf tabata e catalizador, y considera un di su gran logronan.  Su mensahe tabata cla, esta cu educacion no ta depende di edad, y cu esaki ta yuda hopi persona haya un segundo chens den bida.  FEPA a yega pa duna hendenan di tur edad, un chens pa sigui studio y haci cursonan practico.

   Resultado di FEPA na Aruba ta grandi!  Ta hopi hende mes a logra drenta, of haya puesto nobo den mercado laboral, mehorando nan puesto y futuro profesional.  FEPA lo keda como prueba bibo di su vision completo, y su amor pa e progreso di su pais.

   Pero e no kier a keda djis na eynan so, mente tabata pa duna lesnan di MBO 1 y tambe MBO 2, di duna educacion na esnan cu ta maneha Créche na Aruba, tambe enfocando riba lesnan den Prison di KIA.  Sigur tabata algo historico, ora cu 49 doño di Créche a logra nan diploma MBO 3 SPW. Hopi hende a pensa cu e no tabata posibel, pero Randolf y varios sostenedor a demostra cu e ta alcansabel.

   Esnan cu a gradua na FEPA, tabata expresa con nan tabata mira wowonan di Meneer Randolf ta briya di alegria.  E tabata orguyoso di cada uno cu tabata gradua, demostrando asina cu su vision ta logrando.

   FEPA sigur a perde un di su pilarnan, studiante- y demas docentenan a perde un fenomenal amigo.   Aruba a perde un gran baluarte.

   Meneer Randolf a haya importante pa a traduci e buki ‘Ken a move mi keshi’, mirando con importante e ta pa yuda hendenan cu kier busca un rumbo nobo pa nan bida.  Riba e potret aki por mira Randolf Vrolijk (President di FEPA), hunto cu Jerehm Campbell (Consehero di Maneho), y Karen Croes-Torres Jimenez (co-autora di e buki) entregando un copia na Gobernador Boekhoudt.

   E buki tin como meta pa stimula educacion di adultonan dentro di e comunidad Arubano, particularmente pa esnan cu ta desea di probecha di un segundo of tercer chens pa mehora nan calidad di bida y/of fortifica nan posicion den e mercado laboral.

   Den su servicio social na comunidad, e tabata activo na varios instancia, incluyendo envolvimento direct den Aruba Lions Club, y a yuda hopi pa asina e proyecto Funari a bira realidad.

   Meneer Randolf lo laga un legado grandi atras!  E ta ademas ruman homber di Parlamentario Edgard Vrolijk.

   DIARIO y famia Mansur, ta expresa nan palabra di condolencia na famia di Meneer Randolf Marlon Vrolijk.  Cu Randolf sosega na paz.