Bao peso di Delta+Omicron, petroleo, cambio di clima, chip, inflacion --- *Covid-19 ta menasa Inteligencia Artificial, defensa nacional y alimento --- *Reunion di OPEC y e frustracion humano cu bida y data base na peliger
ORANJESTAD (AAN) — Tur e problemanan cu DIARIO a adverti cu por haci 2022 e aña mas dificil den historia moderno a uni na momento cu mundo tabata prepara pa bolbe na normalidad despues di e parti mas severo di e coronavirus nobo.
Basa riba informacionnan experto cu tabata alcansa DIARIO for di tur skina na mundo na un forma acelera, DIARIO a spierta Aruba pa desaroyonan cu lo a forma e cadena cu awor ta rementa.
Durante 2021 e componentenan cu ta crea peligernan serio, a sigui uni y na final di November, manera por a spera, a rementa den man di hende, cu mester tene na consideracion cu dos asunto sumamente importante den bida di hende, awor ta na peliger.
Pa comprende kico ta pasa actualmente, mester mira e cifranan mundial y e perspectivanan economico cu mundo tabata conoce pa 2020, ora Covid-19 a lansa atake crucial contra economia y bienestar mundial.
Na Siglo 20 diferente factor a crea un Epoca di Oro pa hende. Guera Mundial a destrui cantidad di nacion pero na mes momento a resulta den miho ganashi y entrada pa industrianan di arma, di tecnologia di guera, transportacion.
Fortuna inmenso a wordo uza den creacion di un economia nobo despues di Segundo Guera Mundial, ora tambe tecnologia nobo a sigui avansa y a saca hende for di campo, for di bida normal pa crea un mundo nobo.
Despues di Segunda Guera Mundial, den un Epoca di Oro, hende a cuminsa depende mas y mas di instrualisacion, tecnologia y Inteligencia Artificial.
Na 1999 e miedo grandi tabata, cu algo lo a pasa y lo a haci cu na 2000, tecnologia y Inteligencia Artificial lo a basha abou pero e superacion di problemanan a wordo supera.
DIARIO na 2019 a presenta na Aruba e thesis nobo di e “Era di Inteligencia Artificial”, den cual poco poco hende lo a wordo elimina den produccion dor di robot, dor di tecnologia, den cual chip lo a hunga un papel grandi.
Mientras mundo a cuminsa puntra su mes kico lo a pasa si tecnologia lo a domina hende, e Coronavirus nobo a haci su entrada y a haci cu pa motibo di problema di salud, un cantidad grandi di hende no por a produci mas.
E pronosticonan cu mundo a crea di avance den futuro, tabata basa riba e adelanto di tecnologia, cu a duna poder na paisnan cu por a amplia nan tecnologia riba tur tereno.
Di e produccion den un fabrica di cuminda pa e produccion di arma militar, tecnologia no por a reemplasa hende, cu a base di Inteligencia Artificial tabata progresa.
Hasta defensa nacional ta depende di e chip mescos cu aparatonan den Cuido Medico.
E progreso aki tabata basa riba e forma cu por a uza sistemanan computerisa pa haya informacion, cu a wordo hinca den “banconan di informacion” (data base) cu por a duna hende tur contesta sin cu hende mester uza nan cabez.
Esaki a yuda mundo crea vacuna na un forma acelera ora e Covid-19 a presenta, pero pa sistemanan computerisa por funciona, hende mester di entre otro chip, cu a haci hopi pais na mundo, sigur den Oriente, sumamente poderoso.
Ora fabricanan no tabata tin basta hende pa produci chip, menos auto a wordo fabrica, produccion a wordo afecta y hasta articulonan automatico pa uzo na cas, no por traha mas.
Te cu ayera ainda paisnan tabata trata pa atende cu e scarcedad di chip, cu ta afecta economia mundial y a haci entre otro China y Hapon paisnan economicamente poderoso.
Awe paisnan Arabe ta reuni pa mira kico ta haci cu prijs di petroleo cu a aumenta loke a causa cu costo di bida a aumenta pa tur hende despues cu e scarcedad di chip a baha produccion pa motibo di mas trahador cu pa morto of malesa causa pa Covid-19 mester a stop di produci.
Den tur esaki tin e resultadonan di cambio di clima, cu ta causa desastrenen natural sigur na paisnan pober cu no por yuda nan mes.
Den e situacion aki placa ta caba den cartera di hende sin trabou, cu menos entrada, pero tambe miedo di muri. Turismo mundialmente a wordo afecta na forma sumamente serio y awe e variante nobo di Covid-19, ta sigui menasa turismo.
Awe OPEC mester bisa kico lo pasa cu prijs di petroleo, cu a aumenta prijs di transportacion pero a haci turismo mas costoso tambe.
Aruba mester sigui prepara su mes pa un tempo sumamente dificil cu lo habri 2022 y di cual DIARIO lo sigui pone Aruba na haltura.
