ORANJESTAD (AAN): Awe mainta Hues di Corte den Promer Instancia ta dicta sentencia den e caso di labamento di placa cu Ministerio Publico a cuminsa contra Paul Croes.
Tin un diferencia den suma cu ta sospecha di cu Paul Croes lo a laba. Fiscal ta papia di 207 mil florin mientras cu abogado mr. Illes ta papia di 183 mil florin.
Tratamento di e caso aki a tuma lugar luna pasa caminda un Hues di Curacao a bin Aruba pa trata e caso aki.
PAUL: NO TABATIN LABAMENTO DI PLACA
Paul Croes a bisa Hues cu a purba di splica Hof di Corte Superior cu no ta asina cu a laba placa. El a splica cu ta masha trabao y bergonzoso pa bay pidi esnan cu a asisti na nan casamento pa bisa cuanto placa a duna na regalo y mester a laga nan firma. Segun Paul Croes, tur esaki a haci pa demostra cu no tabatin labamento di placa. Lamentable Hof ta opina otro. Hues a puntra Paul Croes si e tin trabou. Paul Croes a splica cu for di 2018 e no tin salario mas y no tin trabao. Nan ta huur nan cas y Melony tin negoshi pa asina yega na placa pa mantene famia. Paul Croes a bisa Hues cu e ta den un situacion hopi dificil.
FISCAL KIER PAUL PAGA 207 MIL FLORIN
Fiscal a bisa cu den un caso di kitamento di propiedad ta basa riba calculacionnan cu a haci den actividadnan criminal. El a bisa cu e hecho cu awor Paul Croes no tin placa, no ta relevante. Paul Croes a wordo condena den Hof pa entre otro labamento di placa conforme loke Ministerio Publico a demanda. Fiscal a demanda algo mas di 207 mil florin. El a bisa cu si Paul Croes no paga lo tin un castigo di prison maximo di 3 aña.
ABOGADO
Mr. Illes a bisa Hues cu Paul Croes mester a haci investigacion grandi pa determina cuanto placa a haya ora di casamento. E abogado a bisa cu Hof a pone esaki un banda. E abogado a haci apelacion na Hues pa tuma esakinan na cuenta. E abogado a mustra cu Fiscal ta papia di 207 mil mientras cu Hof ta papia di 183 mil florin. E ta haya cu tin un fayo den calculacion di hof. El a mustra cu Fiscal tabata papia di 16 mil florin den Promer Instancia caminda Hof ta menciona 6 mil. E 10 mil florin aki a keda colga. El a bay coba den e sentencia di Hof pa mustra Hues unda specificamente esaki ta wordo menciona.
DIARIO lo publica kico ta e decision di Hues den e caso aki.
