ORANJESTAD (AAN): Departamentonan di Salud di tur parti di mundo a confirma casi 3,4 miyon di contagio di COVID-19 den ultimo 24 ora,
un record diario den un momento cu e variante Omicron ya ta dominante, segun datonan provisional di Organizacion Mundial di Salud (WHO).
E cifra record aki ta mesun cantidad di caso positivo registra den prome cuatro luna di e pandemia, cu un total di mas di 312 miyon den dos aña di e pandemia, un cifra por bisa mas abaor, mirando cu WHO ta kere cu tin un cantidad grandi di caso cu no a wordo diagnostica of notifica na departamentonan di salud di cada pais.
E curva den aumento exponencial di contagio actual a sigui sin afecta estadistica di morto, cu a keda stabil y alrededor di 7.000 morto pa dia (7.700 den ultimo 24 ora).
WHO ta insisti cu apesar di predominio di casonan no grave den e ola actual, no mester subestima capacidad di Omicron di causa dañonan, ya cu hopi sistema sanitario ta sufriendo presion pa aumento di casonan.
E organizacion tambe a enfatiza cu esaki no lo ta e ultimo "variante di preocupacion" di coronavirus, apesar cu nan no por predeci si e siguiente lo causa un tipo di enfermedad mas of menos grave.
E variante Omicron, prome detecta na Sudafrica na comienso di november di 2021, ya ta presente den un 58,5 % di analisis efectua red global di laboratorio GISAID, loke ta indica cu esaki ta e variante dominante, superando e dominio di Delta.
