ORANJESTAD (AAN): Diasabra awor, 15 di Januari, Aruba lo conoce su prome casting enbusca di “Miss Eco Aruba 2022”, kende lo representa e isla aki pa prome biaha den certamen na Egipto na luna di Maart 2022.
E comision di Vicky Foundation di Hulanda a uni cu Miss Teen Aruba Foundation (organizador di Miss Youth Aruba) pa hunto haci esaki bira un realidad.
DIARIO a haya sa cu Vicky Dammerman y Robin Croes-Ponson, director di Miss Youth Aruba, lo ta buscando e embahadora di Aruba. E dos personanan aki no ta desconoci den mundo di beyeza, tanto na Hulanda, Curacao, y Aruba.
E casting mes lo ta Diasabra 15 di Januari for di 4:00 pm pa 7:00 pm na Checkpoint Color. Ta pidi tur dama hoben pa bin den un tanki-top preto y un legging preto.
Rekesitonan pa bo participa na e casting, ta cu bo mester tin entre 18 y 28 aña di edad, no ta casa, nacionalidad Hulandes, mester ta motiva, cu hopi gana pa siña y representa bo pais.
