Ministro Geoffrey Wever riba Dia Internacional di Muhe:
ORANJESTAD (AAN): E fecha di 8 di Maart ta marca Dia Internacional di Muhe, fecha dedica na memoria historico, reconosimento di logro y reafirmacion di compromiso pa un sociedad mas husto y inclusivo. E dia aki tambe un momento pa honra e resiliencia, creatividad, y poder economico di muhenan rond mundo.
Pa Aruba, e dia aki ta un oportunidad pa reconoce cu hende muhe no ta simplemente participantenan den nos economia; nan ta forma un parti esencial di desaroyo di nos economia. Ora nos refleha riba nos progreso, e datonan di e ultimo raportnan economico y social ta resalta un berdad cla: ora muhenan empresario tin exito, Aruba tin exito.
Segun e Censo di 2020, muhenan awor ta ocupa 45,3% di tur posicion di maneho (managerial positions) na Aruba. E liderazgo aki ta visibel den varios di nos sector economico, for di produccion di cuminda artesanal te na innovacion cientifico.
Na 2025, DEZHI a lansa nan campaña "Cumpra Local". Esaki a pone den spotlight algun negoshi destacabel lidera pa muhe cu ta contribui na e structura social y economico di nos isla:
(*) Zaida Everon, doño di T2Pan Sourdough Boutique, ta demostra con vakmanschap cientifico por construi un marca local exitoso.
(*) Rachell Peterson, fundado di Farma Cure Fungi, ta un pionero den agricultura sostenibel, usando metodonan di laboratorio pa produci hongo medicinal y culinario di alta calidad aki mes riba nos isla.
E muhenan aki ta representa e cientos di empresarionan cu ta converti vision den realidad, creando empleonan y diversificando nos economia.
E Impacto di "She Means Business": E Ministerio di Economia y Finansa, a traves di e Directie Economische Zaken, Handel en Industrie (DEZHI), ta comprometi pa brinda e hermentnan necesario pa muhenan escala nan proyectonan. Na maart 2025, Exprodesk a lansa e iniciativa "She Means Business: Women Empowerment Month". Dentro di e programa aki, a ofrece un serie di workshops diseña pa construi "capacidad di exportacion" y "mentalidad empresario" y duna hende muhe mas tools y conocemente dentro di varios areanan pa nan por desarroya nan mes como empresario.
Di e clientenan nobo cu a busca guia na IDEA, cual ta forma parti di DEZHI, na 2025, casi 40% tabata muhe buscando pa cuminsa of expande nan mesun empresa. Es mas, e following di IDEA ariba plataforma social, ta mayoritariamente femenino, cu muhenan den e categoria di edad di 35-44 aña formando e segmento mas grandi y activo di nan 3.100 siguidornan. Esaki ta demonstra un deseo y interes grandi y activo pa emprendemento cerca muhenan Arubiano.
Banco Central di Aruba ta raporta cu nos Gender Inequality Index (GII) a mustra un tendencia di reduccion riba termino largo, locual ta nifica cu nos ta moviendo mas cerca di igualdad berdadero. Es mas, Aruba ta destaca su mes cu un di e nivelnan mas abou di desigualdad di genero ora nos wordo compara cu otro Small Island Developing States (SIDS).
Minister Wever ta aplaudi e trabao di DEZHI, IDEA y Exprodesk pa nan trabao continuo pa apoya, inclui y stimula e participacion di hende muhe den e mundo di entrepreneurship y empresa. Tambe minister Wever ta reafirma e compromiso di Kabinete AVP- Futuro pa sigui traha den colaboracion cu sector priva pa yega na un igualdad berdadero.
Dia Internacional di Muhe ta enfatiza e importancia di promocion di igualdad di genero y e proteccion di derechonan di muhe y ta un recordatorio cu igualdad di genero no ta solamente un meta social, e ta un manera pa aporta na un economia mas sano, diversifica, resiliente y fuerte.
