Parlamentario Evelyn Wever-Croes:
- Tin hopi den liderazgo y ta haciendo un tremendo trabao
ORANJESTAD (AAN) Parlamentario y lider di Partido Movimento Electoral di Pueblo, señora Evelyn Wever-Croes, den entrevista cu DIARIO a expresa cu hende muhe na Aruba ta hopi privilegia.
“Tin hopi hende muhe den liderazgo cu a haci, y ta haciendo, un tremendo trabao pa Aruba. Nos ta privilegia den e sentido cu den e generacion di nos, hende muhe por a studia, por a traha.
Den un generacion prome cu nos no tabata tin e oportunidad ey, nan mester a keda cas. Den nos generacion, esey no ta hunga un rol. Kiermen, nos ta sinti cu nos ta privilegia, nos tin e plataforma pa por haci cosnan grandi pa Aruba, pero mi ta sinti si, cu tin presion”, señora Wever-Croes a señala.
El a agrega cu mescos cu tin presion den mundo, e hende muhe ta sintie dobel.
“Pakico? Pasobra hende muhe ta take care di hopi hende, no solamente di su mes. Pero hopi biaha di e pareha, di e famia, di e mayornan, e yiunan, pero den e proceso tin biaha nos ta lubida di nos mes, anto nos ta purba tambe di traha mas duro, pasobra nos ta sinti cu nos tin cu duna mas, pa haya mesun reconocimento cu hende homber. Kiermen, nos ta haya extra presion riba nos, y mi ta haya hopi importante pa para nos keto: mi ta bisa di un banda, privilegia, pero di otro banda nos tin cu ta cauteloso si, y cuida nos mes, pasobra si no, nos no por duna na un otro hende”, Wever-Croes a expresa.
El a bisa cu ta mescos cu ora bo sirbi hendenan awa, por ehemplo, den un canica bashi bo no por sirbi nada. “Kiermen, bo tin cu percura pa semper bo canica ta yen, pa percura pa bo ta bon, pa bo tin energia, pa bo yuda tur esnan cu bo tin cu yuda”, Parlamentario Wever-Croes a subraya.
