Muchanan ta mirando ‘Huggy Wuggy’ riba Internet cu ta splica nan con pa mata nan mayornan

Fundacion FADA ta adverti mayornan di un peligro nobo riba TikTok

ORANJESTAD (AAN): E siman aki, Fundacion FADA a haya cu ta urgente pa core manda un mensahe rapido pa mayornan na Aruba, pa nan vigila loke nan yiunan kizas ta follow riba e plataforma di TikTok.

   Rubiella Toppenberg, kende ta trahador preventivo di Fundacion FADA, a bisa cu un figura (‘character’) hopi temible a bira viral y ta circulando hopi riba Social Media.  E ta yama su mes ‘Huggy Wuggy’, e ta color blauw y tin apariencia un tiki espantoso y tambe violento.  Tambe tin otro color roos cu ta yama ‘Kissy Missy” cu tambe ta circulando riba TikTok y otronan, incluyendo Instagram y YouTube.

   Algo alarmante ta e hecho cu tin diferente “fan pages” cu a wordo crea y ta haciendo hopi sensacion cu esaki caba.  E pensamento ta cu uno di esnan mas peligroso ta e parti di YouTube, y no djis riba e YouTube en general cu tur hende ta usa, sino tambe e servicio special cu yama YouTube Kids.

   Segun Toppenberg, e yamada cu nan ta haci ta pa suplica mayornan pa nan revisa nan yiunan ora nan ta riba e plataformanan social aki.  “Pone mas atencion riba loke e muchanan ta mirando,” Rubiella Toppenberg a bisa.

   Mata bo mayornan: “Huggy Wuggy” ta un personahe cu ta papia cu e muchanan, y ta splica nan con pa “mata nan mayornan’.  Esaki ta hopi alarmante, pasobra den pasado ya caba a yega di confronta situacion similar (corda riba ‘Momo’) cu tambe tabata un persona espantoso, y hasta morto a cay debi na esey.  Momo tabata splica muchanan con pa mata nan mes.

   Awor e personahe ta ripiti cu otro escenario, unda via un simple wega ta haya e instruccion.  Pero e wega aki di ‘Puppy Playtime’ ta den esaki, y hendenan cu menos bon intencion, intencionalmente a inclui esaki como un “propaganda” di YouTube.

   Pues un mucha cu ta mirando un video of cartoon, diripiente lo haya e ‘propaganda’ aki riba pantaya, y si acaso e mucha no ta conciente di esaki, e ta djis keda mira e propaganda y scucha e mensahe.

   Docentenan ta preocupa: Tin di corda cu no ta tur mucha ta den e mesun balance di salud mental.  Si acaso e tin un desbalance un caminda, e video aki facilmente por perhudik’e, y esey ta algo no deseable.

   “Pesey nos kier a haci un yamada na tur mayornan riba esaki,” e trahador preventivo di FADA a indica na DIARIO.  El a splica cu docentenan tambe ta preocupa, pasobra algun a hasta puntra den klas si nan sa kende ta Huggy Wuggy y tambe kende ta Kissy Missy, y pa nan sorpresa, e muchanan a bisa cu nan tambe ya caba sa kende nan ta!

   Tin algun mucha cu a bisa cu nan no a mire mes ainda, pero ta importante pa no laga nan mira e video, pa despues abo splica nan.

   “Awor cu abo como mayor tin e informacion, sinta cu bo yiu, y bis’e cu tin cosnan ta pasando di Huggy Wuggy y tambe Kissy Missy, y cu e personahenan aki ta negativo y ta bay influencia un mucha pa haci cosnan negativo.  Bisa e mucha, si e mira e video ey aparece, facilmente primi X (close) e app, pues cera YouTube un rato, y habri’e bek despues.”

   Pero no bay sinta scucha kico e ta papia, pasobra e ta nada nada positivo!

   No por blokea e propaganda:  Tin algun manera, pero mayoria hende na Aruba no tin forma con pa blokea propaganda riba YouTube specificamente esnan cu ta usando e app riba nan Smartphone of Tablet.

   Solamente si bo abona riba YouTube Premium lo bo por mira video sin propaganda.  Loke ta mal genio ta cu esnan cu a crea Huggy Wuggy intencionalmente ta pone propaganda pa sali riba e plataformanan aki sin cu bo por haci nada.

   Pesey un suplica fuerte pa check loke bo yiunan ta mira, papia cu nan, y evita lo peor.