ORANJESTAD (AAN)—Director di Fundacion Contra Violencia Relacional (FCVR), Magaly Maduro, a comenta den conferencia di prensa, cu durante reunion cu Formador Wever-Croes,
tambe el a informe tocante hobennan cu ta pidi hospedahe na e fundacion, pa sali di un ambiente di violencia domestico y cu tin un gap na Aruba pa e tipo di casonan aki.
Maduro ta splica: “Loke tambe nos a mira aña pasa ta un aumento di muchanan entre 16 pa 17 aña, pues no ta mayor di edad, pero ta lantando den un cas unda tin violencia, y nan ta dicidi cu no kier biba mas eyden, y na momento aki tin un gap na Aruba cu e muchanan aki no por haya opvang den e fundacion ni den Imeldahof, pasobra nan no tin di haber cu husticia. Esaki ta un punto cu mi a caba trece dilanti tambe cu Formador. E grupo aki ta birando grandi, y ta hobennan cu ta bay HAVO of Colegio EPI, y nan ta dicidi cu nan no kier biba mas den e violencia y nan ta acerca Voogdijraad, Sostenemi, of Sociale Zaken pero door cu nan no tin caminda pa hospeda, nan ta tuma contacto cu nos y semper bao medida di Voogdijraad of cu acuerdo di e ‘gezag vragen’ nan lo por keda un cantidad di tempo cerca nos. Nos tin cinco di e casonan aki”, Magaly Maduro a duna di conoce.
El a papia di, probablemente, un caso nobo aworaki, door di un yamada cu el caba di haya, y el a splica cu cada caso ta individual y mester wak si e caso di e menor aki ta pas den nan setting, pasobra nan tin regla y no ta un “back in breakfast”.
“Tin regla, tin ora di drenta, tareanan di cas pa haci. Kiermen nos tin cu check cu e menor, wak kico e situacion ta anto e ora ey nos ta mira unda nos por yuda. Pero, en principio, Fundacion Contra Violencia Relacional, no ta pa esaki”, Magaly Maduro a subraya.
