ORANJESTAD (AAN): Tabata den oranan di merdia, cu Rescue and Coordination Center di Guardacosta di Caribe Hulandes, a haya informacion di Central di Polis na Bonaire, cu tin un situacion riba e isla.
Famianan di un homber di 67 aña di edad, a bati alarma cerca Polis, pasobra e homber aki lo a sali cay den mondi.
E homber aki a bay jaag den mondi, pero debi na e calor insoportable e dianan aki, el a bira malo y a cay tambe. Debi na e caida aki, e homber no por a sigui cana.
Bon mes cu e homber tin un celular cune, y el a yama e famia pa bisa cu e ta den mondi Boca Onima y cu e mester di yudanza urgente.
Ora cu e yamada aki a drenta na Guardacosta, nan a dicidi na manda e Helicopter di nan mesora pa e area di Boka Onima pa yuda busca y rescata e ciudadano.
E Helicopter a logra di localiza e homber basta rapido. E tripulacion profesional a baha, y a logra di hise bay halto y drenta e helicopter.
Despues nan a bay rumbo pa Flamingo International Airport na Kralendijk, unda un Ambulans tabata wardando riba dje. Nan a transferi e homber herida pa asina bay cune Hospital.
