Muchanan di Scouting Ora Ubao a siña prepara cuminda tradicional Arubiano for di nos grandinan

En conexion cu proyecto “Generation Swap” di DOZ

ORANJESTAD (AAN): Directie Ouderenzaken (DOZ) recientemente a organiza diferente actividad di e proyecto “Generation Swap” (Intercambio di Generacion), un iniciativa cu ta uni adultonan mayor y hobennan di Aruba. Door di tayernan interactivo, incluyendo cushina tradicional y crioyo, participantenan a comparti conocemento, conoce otro miho y fortalece e conexion y comprondemento entre diferente generacionnan.

   Como parti di e iniciativa aki, diasabra 20 di juni, grupo di bever, welp, verkenner, explorer y lidernan di Grupo Scout Ora Ubao a participa na un actividad educativo special cu a tuma luga na YMCA Dakota. E encuentro a brinda e muchanan e oportunidad pa conoce, aprecia y experimenta cu un parti importante di patrimonio culinario di Aruba.

   Varios invitado di edad mayor cu hopi entusiasmo y pasenshi a comparti nan conocemento tocante preparacion di diferente plato y pasabocanan tradicional. Durante e seccion special aki, e muchanan a siña con ta prepara pan bati, funchi, tutu y corned beef manera tradicional di Aruba, huntu cu otro delicianan cu pa hopi aña a forma parti di cushina den casnan Arubiano.

   No solamente e muchanan a siña e recetanan y e tecnica pa prepara nan, sino nan a conoce tambe e historia y importancia di e cumindanan aki den bida diario di generacionnan anterior. Nan mes a mescla ingredientenan, a traha masa, a yuda cushina y, naturalmente, a disfruta di e resultado final.

   Na final di e actividad, e muchanan a hiba cas loke nan a prepara pa comparti especialmente cu nan papinan den conexion cu celebracion di Dia di Tata. Grupo Scout Ora Ubao a ricibi hopi reaccion positivo di mayornan cu a purba e cumindanan prepara pa e muchanan.

   E iniciativa aki tabata un exito, pasobra no solamente a fortalece habilidadnan practico di e hobennan, sino tambe a crea un brug entre generacionnan, preservando tradicionnan cu no mester perde cu paso di tempo.

   Grupo Scout Ora Ubao ta expresa su sincero gradicimento na e damanan di edad mayor pa nan dedicacion y pa ta dispuesto pa comparti nan experiencia, y tambe ta gradici tur mayor cu a permiti nan yiunan participa den e actividad.

   Un gradicimento special ta bay tambe na Directie Ouderenzaken (DOZ) pa organiza e dia aki pa Grupo Scout Ora Ubao forma parti di “Generation Swap” y pa promove iniciativanan cu ta fortalece respet, conexion y intercambio di conocemento entre generacionnan. Cu colaboracionnan manera esaki, Grupo Scout Ora Ubao ta sigui aporta na formacion integral di hobennan y na preservacion y engrandecemento di nos tradicionnan Arubiano.