Muchanan di Casa Cuna a goza den cuadro di ‘December Giving’

ORANJESTAD (AAN): Recientemente Rotaract Aruba y Grant Thornton Aruba a uni forza pa duna muchanan di Casa Cuna un ‘day out’.

E evento ta forma parti di e proyecto yama “December Giving” unda Rotaract Aruba ta haci diferente actividad “hands-on” pa comunidad den temporada di fin di aña.

   Grant Thornton Aruba a contribui na e bunita evento den cuadro di giving den december, empleadonan a duna un parti di nan kerstpakket como donacion pa cumpra keds regalo pa e muchanan.

   Den pasado Rotaract Aruba a yega di organiza movie nights na Imelda Hof mes unda cu tabata haci setup bou di afdak cerca nan. E aña aki a scoge pa un otro grupo, a acerca Casa Cuna y invita e muchanan nan pa bay wak un movie pafor di “cas”. Pa den un ambiente diferente e muchanan por a disfruta di e pelicula 'Encanto' na The Cinemas hunto cu nan 'leidsters', Rotarian y Rotaractors presente.

   Durante e pelicula tur mucha a ricibi nan treat y despues di e movie, a pasa cu nan Häagen-Dazs pa asina termina e atardi cu un dushi ice-cream mientras tur mucha a ricibi nan keds regalo. Lorena Maduro, Business Process Solutions (BPS)director na Grant Thornton Aruba ta splica cu e idea tras di e regalo ta pa duna e muchanan algo cu nan por keda usa tambe despues di e temporada di fiesta.

Rotaract Aruba y Grant Thornton Aruba ta sumamente contento y agradecido di por a brinda e muchanan un atardi 'fun' y wak nan disfruta nan Diadomingo. No tin nada mas bunita cu mira e caranan contento na final di dia.