Muchanan a goza riba di evento di nos servicionan di  emergencia

ORANJESTAD(AAN): Diabierna tabata di 5 aña cu instancianan di emergencia a organiza un dia special di demostracion pa muchanan, en conexion cu Dia Internacional di Mucha.

Durante un entrevista cu DIARIO, Liberato Hoek di Ambulans a splica cu hunto cu Polis, Brandweer, Bureau Rampenbestrijding y Kustwacht a entretene e muchanan y a duna nan bastante informacion.

“Durante e aña nos sa bishita e scolnan, pero e biaha aki nos kier a haci algo diferente, mirando cu Diadomingo awor ta Dia di Mucha y pesey nos kier a duna bek na e muchanan, algo di e departamentonan via e personal cu ta haci esaki na un manera boluntario, segun Hoek.

El a gradici director di ImSan, Joel Rajnherc pa su colaboracion y tambe otro instancia y departamentonan cu a yuda den esaki.

Te hasta Helicopter a presenta pa deleita e muchanan.

DIARIO a entrevista tambe vocero policial, Liliana Rasmijn, kende a bisa cu semper Cuerpo Policial ta cla pa participa na e evento cu ta e ‘baby’ di Liberato Hoek.

“Nos a bin cu brommer y autonan di polis pa duna e muchanan un bunita dia, mirando tambe cu dia 20 di November ta Dia Internacional di Mucha. Nos tey pa proteha tur mucha na Aruba, pues ban tira un bista riba nos muchanan,” segun Rasmijn.