Pueblo ta vota pa dicidi kende lo gana placa di belasting di comunidad
*Ley ta splica pakico Evelyn Wever- Croes ta bon capitan pa Aruba
*Pa tin fe y speransa den futuro Aruba no por vota pa cualkier charlatan
ORANJESTAD (AAN) — Despues cu partidonan politico a inscribi, awe e momento a yega pa cada partido splica Pueblo kende lo ta e personanan cu e partido ta presenta pa representa Pueblo di Aruba den Parlamento di Aruba y asina tambe bira base pa un Gobierno nobo pa Aruba.
Historia politico di Aruba na Siglo 21, sigur ta uno sumamente interesante cu por entrega documentacion pakico Leynan di Aruba y di Reino ta asina estricto ora nan ta presenta nan exigencianan pa gobernacion di e pais.
No mester lubida cu Pueblo no solamente ta entrega candidatonan pa bira personanan cu ta bay dirigi e pais den Parlamento y gobernacion ehecutivo, pero cu Pueblo tambe ta entrega nomber di e candidatonan cu e mester paga cu su placa di belasting pa nan traha pa e pais y pa ciudadanonan.
E por sona duro, pero esaki ta e base di e proceso di eleccion cu ta habri caminda pa partidonan politico entrega na Pueblo di Aruba e lista di personanan cu cada partido kier pa drenta servicio di Pueblo den Parlamento y di Gobierno y dicidi kico ta pasa cu placa di Pueblo.
Ta e berdad amargo aki a haci cu durante e prome 25 aña di Siglo 20, Pueblo di Aruba a conoce e momento cu Hulanda na 2014 a bati na porta di Fort Zoutman pa exigi Mike Eman cu tabata muri den huelga di hamber, pa baha imediatamente y asina haci loke segun Ley, Gobierno Hulandes tabata exigi di Mike Eman.
Na e momento cu Gobierno di Reino a interveni, el a entrega e pruebanan cu Ley ta exigi cu Mike Eman no a demostra ningun speransa y amor pa Aruba cu sigur no por a biba cu e fe, cu Mike tabata cumpli cu loke ley tabata exigi pa e haci como Prome Ministro cu tabata wordo paga cu placa di belasting di Pueblo.
Reino Hulandes a base di Statuut cu ta regla e relacionnan den Reino, a exigi Mike Eman cambia e maneho cu e tabata hiba y pone un fin na e abuso cu e tabata haci contra Pueblo di Aruba, cu el a hinca den debe pa awe paga belasting y asina no goza di e beneficionan cu awor a wordo logra den un Gobierno nobo.
\Na e momento aki, nos no ta mete den loke a bira awendia politica, pero nos ta bay directamente na e base di politica, cu ta hancra den democracia y cu ta exigi na prome lugar respet pa e Pueblo cu no por wordo manipula pa ningun politico y sigur no politiconan cu practicamente henter nan bida, a beneficia di politica y enbez di debolbe amor cu amor, a zink e bienestar di e Arubiano.
Ora Gobierno di Reino bisa cu e bon maneho di Prome Ministro Evelyn Wever-Croes haya continuacion, no ta pasobra Gobierno dirigi dor di Wever-Croes a priminti promocion di proyectonan pa Hulandes por ehempel.
Gobierno Wever-Croes a logra e milagro di scapa Aruba for di e desaster cu Mike Eman a laga atras durante su tempo como Prome Ministro di Aruba.
Ora ta entrega un conseho di voto na un pais, mester tene na Ley na un pais manera Aruba cu ta wordo goberna.
Awe na momento cu Prome Ministro Evelyn Wever-Croes como dirigente di MEP presenta su candidatonan na Aruba, e ta entrega e lista cu segun Gobierno Hulandes mester continua den gobernacion na Aruba a base di e trabou cu e gobierno a realiza.
Pa por tin fe den un partido, un pais mester tin sigur cu e partido no ta bolbe hinca e pais den catastrofe. Pa por tin speransa den un partido, un pueblo no por vota pa un partido cu lo destrui e Florin Arubano. Pa por tin amor pa un partido, ta dificil pa un Pueblo vota pa destructor di su felicidad manera a pasa na 2013 ora ya Hulanda a subi avion pa baha Mike Eman for di Fort Zoutman.
Awe e lista di candidatonan ta wordo presenta dor di partidonan, cu a base di ley mester hiba un bon maneho sigur di placa di Pueblo.
Palabra ta keda na Pueblo cu durante e prome 25 aña di Siglo 20 a haya tur prueba kende ta abusa di confianza di Pueblo y con Evelyn Wever-Croes a consagra su mes como e lider cu a entrega Aruba un futuro nobo manera Ley ta exigi!
