ORANJESTAD (AAN): Directiva di Stichting Monumentenfonds Aruba (SMFA) a ricibi e oportunidad pa tene un reunion cu e formadornan pa trata e importancia di cuido di monumentonan na Aruba.
Durante e reunion a presenta informacion tocante e organizacion, e proyectonan y e posibilidadnan pa reforsa e preservacion di monumentonan como parti esencial di nos herencia cultural.
Den e combersacion, a enfatisa cu ta necesario pa e gobierno y SMFA traha mas cerca hunto pa logra un miho cuido di nos patrimonio. A presenta tres punto esencial como base pa un plan sostenibel pa nos monumentonan:
(1) Proteccion di monumentonan den man priva Hopi edificionan monumental ta den man priva y ta fundamental pa por continua cu e proteccion di edificio y casnan historico particular.
Esaki lo contribui na por adkiri fondonan local y den exterior pa por duna sosten na e propietarionan cu e entre otro restauracion y mantencion di nan cas y edificionan historico.
(2) Un plan strategico pa monumentonan di Gobierno di Aruba Gobierno tin hopi monumento bou di su responsabilidad. Mester tin un plan structura pa conserva, restaura y duna un destino apropia na e edificionan aki, cu por contribui na economia y comunidad.
(3) Uzo di monumentonan pa departamentonan gubernamental Organizacionnan y departamentonan gubernamental por tin un rol clave den e re-uzo di edificionan historico. Alocando departamentonan di gobierno den monumentonan, nos ta no solamente conserva nos herencia cultural, sino tambe duna un uso sostenibel na edificionan cu ta actualmente bashi y bandona.
Stichting Monumentenfonds Aruba ta desea un colaboracion constructivo cu e gobierno pa realisa e obhetivonan aki y asina preserva nos herencia cultural pa e futuro generacionnan.
