Monton di sushi haya tur plama den mondi na Canashito

ORANJESTAD (AAN): E ta un trabao duro, pa mira cada biaha ta cuanto sushedad ta bin topa cune den mondi,

y otro area di naturalesa di Aruba.  Y tur esakinan ta wordo haci limpi, door di e.o. Bureau City Inspector cu tin 6 ‘ploeg’ na su disposicion pa ehecuta e limpiesa.

   Esey ta loke Robby Rosel, kende ta relacionista publico di Bureau City Inspector a indica na DIARIO.  Pa colmo despues di a haci cierto area limpi, ya dos dia despues ta bin descubri cu atrobe hendenan anti-social ta benta sushi eynan.

   Limpiesa en general no ta un tarea cu ta cay bao di Bureau City Inspector.  Segun Rosel a agrega, City Inspector simplemente ta duna un man, pa motibo cu e tarea primordial di Bureau City Inspector ta “mantene nos camindanan publico limpi”.

   “No tira sushedad den mondi”.  Pero City Inspector ta recoge nan.  “No tira sushedad riba caminda publico”.  Pero City Inspector ta recoge nan.  “Ramanan di mata cu NV Elmar ta corta y laga tira abao”.  City Inspector ta pasa recoge nan, siendo cu esey no ta nan trabao.

   Tin distrito unda Serlimar tin di recoge, toch Bureau City Inspector ta duna un man y ta recoge sushedadnan.  DOW tin cu handle cu centro di Oranjestad.  Pero tur hende ta mira den luna di December con City Inspector a duna un man pa yuda mantene cuidad limpi.  Tin hopi skina sushi den ciudad, incluyendo e ex-edificio di DOW cu ta cay bao di DOW.  Segun Rosel, e sushedad rond di ex-edificio ey di DOW, ta responsabilidad di DOW mes.  Pero toch Bureau City Inspector ta percura p’e.

   Sushedad cu ta wordo tira pariba di ex-Royal Plaza Mall, aunke e ta cay bao di DOW, toch Bureau City Inspector ta percura p’e.   Na Waf Chikito, e comerciantenan cu ta bende articulonan, nan mes ta benta sushedad parti patras di e kiosconan, y adictonan ambulante ta recoge e sushi ey for di riba Waf Chikito y carga nan pa e area pariba di ex-Royal Plaza Mall (cu ta un tereno priva pertenece na consulado di Venezuela)..

   Pesey ta haic un suplica na tur hende, pa busca bakinan di sushi pa asina bo ta yuda mantene Aruba limpi.

   Por mira riba e potretnan aki, un recien descubrimento di sushedad cu a ser laga atras den un zona cerca di Canashito.  Material di construccion, porta di cas, auto bieu, y mucho mas.  Polis hunto cu City Inspector tabatey pa mira e porkerianan laga atras, y ta mustra un biaha mas cu tin algun hende cu djis no tin compasion pa naturalesa di e isla.